Սաուդյան Արաբիայի թագաժառանգն ԱՄՆ-ում է՝ պաշտպանության, արհեստական բանականության և միջուկային ծրագրերի օրակարգով, գրում է Reuters-ը։
Սաուդյան Արաբիայի թագաժառանգ Մուհամմեդ բին Սալմանի և ԱՄՆ նախագահ Դոնալդ Թրամփի հետ Սպիտակ տանը կայանալիք հանդիպման նպատակն է խորացնել նավթի և անվտանգության ոլորտում տասնամյակների համագործակցությունը՝ միաժամանակ ընդլայնելով կապերը առևտրի, տեխնոլոգիաների և, հնարավոր է, միջուկային էներգիայի ոլորտներում։
2018 թվականին Ստամբուլում սաուդյան գործակալների կողմից Ջամալ Խաշոգջիի սպանությունից հետո, սա թագաժառանգ Մուհամմեդ բին Սալմանի առաջին այցն է ԱՄՆ։
Սաուդյան Արաբիայի առաջնորդը տարածաշրջանային անկայունության պայմաններում անվտանգության երաշխիքներ է փնտրում և ցանկանում է հասանելիություն ունենալ արհեստական բանականության տեխնոլոգիաներին և առաջընթաց գրանցել քաղաքացիական միջուկային ծրագրի շուրջ համաձայնագրի ուղղությամբ։
Խաշոգջիի սպանության հետ կապված «էջը շրջվել է»,- ասել է Սաուդյան Արաբիայի Նաիֆ Արաբ համալսարանի միջազգային հարաբերությունների դասախոս Ազիզ Ալղաշիանը։
Միացյալ Նահանգները և Սաուդյան Արաբիան պայմանավորվել են, որպեսզի անվտանգություն ապահովելու դիմաց թագավորությունը բարենպաստ գներով նավթ վաճառի։
