Պետությունը և մասնավոր հատվածը համատեղ աշխատելու են՝ աջակցելով , հանքարդյունաբերության ոլորտում բարեփոխումների իրականացմանը՝ Ծաղկաձորում ընթացող հանքարդյունաբերական ֆորումի ժամանակ լրագրողների հետ զրույցում ասել է էկոնոմիկայի նախարարը։
Գևորգ Պապոյանն ընդգծել է ոլորտի կարևորությունը, նշել, որ ոլորտին վերաբերող նախաձեռնությունները պետք է քննարկել շահագրգիռ կողմերի հետ։
«Շատ կարևոր է, որպեսզի հանքարդյունաբերությունը միայն տնտեսական օգուտներ բերի, կամ եթե բնապահպանական խնդիրներ պիտի առաջացնի, այդ բնապահպանական խնդիրները լինեն մաքսիմալ նվազագույնը»,- ասել է նախարարը։
Ըստ նրա՝ էկոնոմիկայի նախարարության ուսումնասիրության առանցքում արտադրական շղթաների երկարացումն է։ «Արտադրական շղթաներ ասելով այսօր մենք հիմնականում արդյունահանում ենք և այդ մեր արդյունահանվածը, ըստ էության, արտահանում ենք։ Մենք աշխատանք ունենք, օրինակ, Զանգեզուրի պղնձամոլիբդենային կոմբինատի կամ Ամուլսարի հանքի հետ, որ, ի վերջո, մենք անցնելու ենք ավելի բարդ, ավելի երկար արտադրական շղթաների, ավելի տնտեսապես բարդ արտադրանք թողարկելու»,- ասել է նա
Պապոյանը նշել է, որ ոլորտում մի քանի խնդիր կա՝ որոշ հանքավայրերի պաշարները 15-20 տարի հետո կարող են ավարտվել։ Ուստի նոր հանքավայրերի հետախուզման կարիք է նա տեսնում։
