Իսրայելի պաշտպանության բանակը Գազան՝ համանուն հատվածի ամենամեծ քաղաքը, հայտարարել է «վտանգավոր մարտական գոտի», քանի որ իսրայելական բանակը պատրաստվում է քաղաքի վրա խոշոր հարձակման: «Այսօր (ուրբաթ, օգոստոսի 29), տեղական ժամանակով ժամը 10:00-ից սկսած, ռազմական գործողությունների տեղական մարտավարական դադարը չի տարածվի Գազա քաղաքի տարածքի վրա, որը վտանգավոր մարտական գոտի է», — ասվում է Իսրայելի պաշտպանության բանակի Telegram-ում տարածված հայտարարության մեջ:
«Մարտավարական դադարները», որոնց ընթացքում մարդասիրական կազմակերպությունները կարող էին օգնություն հասցնել բնակիչներին, քաղաքում ուժի մեջ են մտել հուլիսի վերջից, երբ Իսրայելը վերացրեց բնակիչներին մարդասիրական օգնություն հասցնելու սահմանափակումները՝ սովի մասին բազմաթիվ հաղորդագրություններից հետո:
Իսրայելը պնդում է, որ Գազայի գոտին իսլամիստական ահաբեկչական ՀԱՄԱՍ խմբավորման վերջին հենակետերից մեկն է, ուստի քաղաքը պետք է վերցվի իսրայելական բանակի վերահսկողության տակ: Միևնույն ժամանակ, բազմաթիվ միջազգային կազմակերպություններ զգուշացնում են, որ քաղաքում մարտերը շատ վտանգավոր են, քանի որ այնտեղ են գտնվում ողջ Գազայի հատվածի համար կարևոր ենթակառուցվածքային օբյեկտները, այդ թվում՝ բժշկական հաստատությունները:
Իսրայելը պահանջել է, որ ՄԱԿ-ը անհապաղ հետ կանչի Սովի գնահատման հանձնաժողովի զեկույցը, որը Գազայի որոշ հատվածներում տարածված սովի մասին է: Իսրայելի արտաքին գործերի նախարարության գլխավոր տնօրեն Էդեն Բար-Տալը չորեքշաբթի՝ օգոստոսի 27-ին, ասուլիսում հայտարարել էր, որ զեկույցը կազմած ՄԱԿ-ի կառույցը «քաղաքականացված» է և աշխատում է ահաբեկչական կազմակերպության շահերից ելնելով:
Սննդի անվտանգության ինտեգրված փուլային դասակարգում նախաձեռնության շրջանակում օգոստոսի 22-ին հրապարակված Սովի գնահատման հանձնաժողովի զեկույցը ցույց է տվել, որ Գազայի հյուսիսը 5-րդ՝ աղետալի, սովի փուլում է, և որ առաջիկա շաբաթներին նույն իրավիճակում կարող են հայտնվել Դեյր էլ-Բալահ և Խան Յունիս նահանգները:
Զեկույցից անմիջապես հետո Իսրայելի վարչապետ Բենիամին Նեթանյահուն հրապարակված տվյալները անվանել էր «բացահայտ սուտ»։
Սննդի անվտանգության ինտեգրված փուլային դասակարգման չափանիշների համաձայն՝ սով է հայտարարվում, երբ 10,000 մարդուց առնվազն երկուսը մահանում են ամեն օր թերսնումից կամ դրա հետևանքով առաջացած հիվանդություններից, ինչպես նաև եթե հինգ տարեկանից փոքր բոլոր երեխաների 30 տոկոսը տառապում է սուր թերսնումից, և եթե բոլոր տնային տնտեսությունների մեկ հինգերորդը սննդային սուր անապահովություն է զգում։
ՄԱԿ-ում Իսրայելի դեսպան Դենի Դանոնը կտրականապես մերժել էր իր երկրի կողմից ռազմական հանցագործություններ կատարելու մեղադրանքները՝ ասելով, որ ՀԱՄԱՍ-ի զինյալները դրանք կատարել են 2023 թվականի հոկտեմբերի 7-ին, երբ հարձակվել են Իսրայելի վրա, և որ պատերազմը կավարտվի, «երբ պատանդները վերադառնան տուն, և ՀԱՄԱՍ-ն այլևս իշխանության գլուխ չլինի»։
