Լեռնային Ղարաբաղից տեղահանված մեր հայրենակիցները ՀՀ քաղաքացիություն ստանում են արագացված կարգով՝ «Ռադիոլուրին» ասել է Ներքին գործերի նախարարության միգրացիայի ու քաղաքացիության ծառայության պետ Նելլի Դավթյանը։
Նրա խոսքով՝ հունիսից ՀՀ քաղաքացիություն ստանալ ցանկացողների թիվը կտրուկ աճել է․ եթե նախորդ ամիսներին դիմումների թիվն օրվա կտրվածքով 50-70 էր, ապա այժմ արդեն 150 է։
Միգրացիայի և քաղաքացիության ծառայության պետը դիմումների աճը բացատրել է բնակապահովման ծրագրի նկատմամբ հետաքրքրության մեծացմամբ։ Նա տեղեկացրել է, որ առաջիկայում կներդրվի հերթագրման համակարգ։ ՀՀ քաղաքացիություն ստանալու համար դիմել է ավելի քան 13 հազար արցախցի, նրանցից 10 հազարն արդեն քաղաքացիություն է ստացել։
