ՀՀ վարչապետ Նիկոլ Փաշինյանը Սլովակիայի վարչապետ Ռոբերտ Ֆիցոյի հետ համատեղ մամուլի ասուլիսի ընթացքում նշել է, որ Սլովակիայի վարչապետի գլխավորած պատվիրակության այցը Հայաստան կարևոր հնարավորություն է՝ քննարկելու երկկողմ օրակարգային հարցերը և ձևավորելու նոր համագործակցության ուղղություններ։
Վարչապետ Փաշինյանի խոսքով՝ այս այցը նոր շունչ է հաղորդում Հայաստանի և Սլովակիայի միջև քաղաքական երկխոսությանը։ Նա նշել է, որ արդեն իսկ կայացել են առանձնազրույցներ և ընդլայնված կազմով հանդիպումներ, որոնց ընթացքում կողմերը պայմանավորվել են առաջիկա ամիսներին շարունակել ձևավորված օրակարգի զարգացումը։
Փաշինյանը նաև հաստատել է իր պատրաստակամությունը՝ պաշտոնական այցով մեկնել Սլովակիա՝ պատասխանելով վարչապետ Ֆիցոյի հրավերին։ Ըստ նրա՝ այդ այցը, որոշ առումներով, լինելու է Երևանում ընթացող քննարկումների շարունակությունը։
Վարչապետը կարևորել է Սլովակիայի աջակցությունը՝ հատկապես Հայաստանում ԵՄ դիտորդական առաքելության տեղակայման հարցում, ինչպես նաև Հայաստանի ներգրավվածությունը Եվրոպական խաղաղության հիմնադրամի ծրագրերում։
Նա նաև ընդգծել է, որ ներկայում ընթանում են ակտիվ բանակցություններ ԵՄ-ի հետ վիզաների ազատականացման շուրջ, և Հայաստանը բարձր է գնահատում Սլովակիայի աջակցությունն այս գործընթացում։
«Իհարկե մեր համագործակցության օրակարգերը շատ ընդգրկուն են, և մենք պայմանավորվեցինք, որպեսզի մեր առաջիկա համագործակցությունը կենտրոնացնենք մի քանի ուղղությունների վրա․ քաղաքական երկխոսություն՝ մասնավորապես այդ թվում Հայաստան- Եվրամիություն հարաբերությունների համատեքստում։ Շատ մեծ օրակարգ կա էներգետիկ ոլորտում համագործակցության՝ մասնավորապես, միջուկային էներգիայի ոլորտում համագործակցության առումով։ Նաև մենք քննարկեցինք ռազմարդյունաբերության ոլորտում գործակցության հնարավորությունները։ Այդտեղ նույնպես տեսնում ենք որոշակի հնարավորություններ, և ես հույս ունեմ, համոզված եմ, որ այս այցի արդյունքներով բոլոր այդ ուղղություններով մենք կունենանք կոնկրետ կոնկրետ օրակարգեր և կոնկրետ նախագծեր»,- ասել է վարչապետ Փաշինյանը։
Նա անդրադարձել է նաև 2025 թվականին Երևանում կայանալիք Եվրոպական քաղաքական համայնքի գագաթնաժողովին՝ շեշտելով դրա նշանակությունը Հայաստանի համար և շնորհակալություն հայտնելով Սլովակիային՝ այդ նախաձեռնությանը սատարելու պատրաստակամության համար։
ՀՀ վարչապետը ողջունել է Սլովակիայի գործընկերոջ այցը՝ ընդգծելով դրա նշանակությունը ինչպես Հայաստան-Սլովակիա հարաբերությունների, այնպես էլ Հայաստան-Եվրամիություն համագործակցության ամրապնդման համատեքստում։
