Նիկոլայ Նիկողոսյանի անունը կրող մշակութային հիմնադրամն ու ցուցասրահը, մեծ քանդակագործի աշխատանքները մշտապես ներկայացնելու առաքելությունից բացի, ունի նաև մի քանի այլ շատ կարևոր գործառույթներ։
«Նիկո գալերին» որդեգրել է որոշակի մշակութային հայեցակարգ, որը ներառում է կրթական, ճանաչողական և երաժշտական միջոցառումների անցկացումը մեր հարթակում։ Մեզ համար կարևոր է կենդանի կապը հանրության հետ։ Լինելով մշակութային վայր, մենք փորձում ենք առավել արդյունավետ օգտագործել մեր հնարավորությունները, կազմակերպելով նոր անունների գեղանկարչական ցուցահանդեսներ, բանախոսություններ, դասընթացներ երիտասարդների համար և ամենատարբեր համերգային միջոցառումներ», — ասում է ցուցասրահի տնօրեն Լիլիթ Հովհաննիսյանը։
Վերջին ժամանակներս մշակութային նոր տենդենց է նկատվում մայրաքաղաքում, երաժշտական միջոցառումներ, որոնք կազմակերպվում են կերպարվեստի տիրույթներում՝ Ձիթողցյանի արվեստանոցում, Արդեան ցուցասրահում, Իգիթյանի անվան գեղագիտության ազգային կենտրոնում և այլն։ Այն յուրահատուկ հմայք է հաղորդում մայրաքաղաքի մշակութային կյանքին, ստեղծում հանրության համար հնարավորություն՝ հագեցնելու գեղագիտական պահանջները արվեստների խաչմերուկներում։
«Ես համակարգում եմ մշակութային միջոցառումների ընթացքը ցուցասրահում։ Կազմակերպում եմ հատկապես համերգներ, տարբեր թեմատիկ հանդիպումներ, քննարկումներ և մշակութային դիսկուրսներ։ Եվ քանի որ մասնագիտությամբ դիրիժոր և խմբավար եմ, հենց այստեղ, Նիկո ցուցասրահի տանիքի տակ նախաձեռնել եմ «Լիլլա» վոկալ քառյակի և նորաստեղծ «Բարի երգչախմբի» առաջին փորձերն ու ելույթները», — շարունակում է մեր զրույցի երկրորդ մասնակից Դիանա Այվազյանը։
Այսպիսով՝ ավանդական, դասական արվեստը համակցվում է ժամանակակից մշակութային երևույթների և դրսևորումների մի քանի տեսակներին՝ ստեղծելով նոր գեղագիտական մթնոլորտ, արվեստի հետ հաղորդակցման նոր հնարավորություններ և միջոցներ։
