Թրամփի վարչակազմը պատրաստվում է կրճատել Հարվարդի համալսարանի ֆինանսավորումը ևս 1 միլիարդ դոլարով, քանի որ ուսումնական հաստատությունը հրաժարվում է փոխել իր քաղաքականությունը, հայտնում է The Wall Street Journal-ը՝ հղում անելով աղբյուրներին։
Նշվում է, որ համալսարանի բժշկական հետազոտությունների համար դաշնային ֆինանսավորումը կկրճատվի։
Հարվարդի համալսարանի նախագահ Ալան Գարբերն ավելի վաղ ասել էր, որ դպրոցը չի ընդունի Թրամփի վարչակազմի պահանջները՝ փոխելու իր քաղաքականությունը՝ կապված հրեա ուսանողներին հակասեմականությունից պաշտպանելու հետ:
Իր պաշտոնը ստանձնելուց հետո Թրամփը կոշտ միջոցներ է կիրառում ԱՄՆ առաջատար համալսարանների նկատմամբ՝ հայտարարելով, որ նրանք սխալ են արձագանքել անցյալ տարվա պաղեստինամետ բողոքի ակցիաներին՝ թույլ տալով, որ համալսարանում բորբոքվեն հակասեմական տրամադրությունները: Բողոքի ակցիաների մասնակիցները, նաև որոշ հրեական խմբեր, պնդում են, որ Գազայում Իսրայելի գործողությունների վերաբերյալ իրենց քննադատությունը շփոթում են հակասեմականության հետ:
Ապրիլի 15-ին Թրամփն առաջարկել էր Հարվարդի համալսարանին վերաբերվել որպես քաղաքական կազմակերպության և զրկել հարկերից ազատված լինելու արտոնությունից։ Կրթության նախարարությունը հայտարարել է Հարվարդի հետ կապված 2,2 միլիարդ դոլարի դրամաշնորհների և 60 միլիոն դոլարի երկարաժամկետ պայմանագրերի սառեցման մասին: Հաղորդվել է նաև, որ ամերիկյան վարչակազմը մտադիր է վերանայել այս էլիտար բարձրագույն ուսումնական հաստատության շուրջ 9 միլիարդ դոլար ընդհանուր գումարի դրամաշնորհներն ու պայմանագրերը։
