Իսրայելի վարչապետ Բենիամին Նեթանյահուն կիրակի ուշ երեկոյան վայրէջք է կատարել Վաշինգտոնում՝ մասնակցելու ԱՄՆ նախագահ Դոնալդ Թրամփի և բարձրաստիճան պաշտոնյաների հետ հրատապ կազմակերպված բանակցություններին։ Քննարկման առանցքում են Գազայի պատերազմի ընթացքը, պատանդների ճակատագիրը (որից 59-ը դեռ գերության մեջ են) և Թրամփի նոր մաքսային քաղաքականությունը, որով իսրայելական ապրանքների վրա սահմանվել է 17% մաքսատուրք։
Նեթանյահուն մեկնել է Վաշինգտոն Բուդապեշտից։ Նրա այցի մասին հայտարարվել է մեկնելուց 24 ժամ առաջ։
Վարչապետը Վաշինգտոն է ժամանել կնոջ՝ Սառա Նեթանյահուի հետ և ուղևորվել է Բլեր Հաուս, որտեղ հանդիպել է ԱՄՆ առևտրի նախարար Հովարդ Լութնիկին և առևտրի ներկայացուցիչ Ջեյմիսոն Գրիրին։
Haaretz-ի հաղորդմամբ՝ Նեթանյահուի ինքնաթիռը շրջանցել է Իռլանդիայի, Իսլանդիայի և Նիդեռլանդների օդային տարածքները՝ խուսափելու համար Միջազգային քրեական դատարանի կողմից տրված ձերբակալման օրդերի հնարավոր կատարումից, փոխարենը անցել է Խորվաթիայի, Իտալիայի և Ֆրանսիայի վրայով։
