Արհեստական բանականության գործողությունների գագաթնաժողովի բացմանը Ֆրանսիան կհայտարարի իր AI ոլորտում 109 միլիարդ եվրո մասնավոր ներդրումների մասին, Ֆրանսիայի նախագահ Էմանուել Մակրոնն ասել է կիրակնօրյա TF1 հեռուստաընկերությանը տված հարցազրույցում։
Ըստ վերլուծաբանների՝ արհեստական ուղեղների մրցավազքում Եվրոպան դեռևս հետ է մնում ոչ միայն ԱՄՆ-ից, այլև Չինաստանից , որը վերջերս զարմացրեց աշխարհին DeepSeek չաթբոտով, որը շատ առումներով չի զիջում և որոշ տեղերում նույնիսկ գերազանցում է արևմտյան անալոգին:
Հունվարի վերջին ԱՄՆ նախագահ Դոնալդ Թրամփը հայտարարել էր, որ OpenAI-ը, SoftBank Group-ը և Oracle-ն առաջիկա չորս տարվա ընթացքում 500 միլիարդ դոլար կներդնեն Stargate նախագծում՝ օգնելու համար Միացյալ Նահանգներին առաջ անցնել Չինաստանից և այլ մրցակիցներից:
Թրամփը Stargate-ն անվանել է AI-ի պատմության մեջ ամենամեծ նախագիծը։ Այն կստեղծի առնվազն 100 հազար աշխատատեղ և երկրում կկառուցի տվյալների մշակման կենտրոններ։
Մակրոնի խոսքով՝ Եվրոպայի համար 109 միլիարդ եվրոն միանգամայն համեմատելի գումար է Stargate-ում կես տրիլիոն ներդրումների հետ, մանավանդ որ առաջին փուլում ամերիկյան նախագծում կներդրվի ընդամենը 100 միլիարդ դոլար։
Bien joué… pic.twitter.com/zthA2zIBja
— Emmanuel Macron (@EmmanuelMacron) February 9, 2025
Գագաթնաժողովի նախօրեին Մակրոնը սոցցանցերում արհեստական ինտելեկտի ստեղծած deepfake-երով գովազդ է հրապարակել, որի գլխավոր դերում ինքն է: Մեկում նա պարում է 1980-ականների հայտնի «Voyage Voyage» հիթի ներքո, մյուսում՝ Ժան Դյուժարդենի հետ նկարահանվում է լրտեսական կատակերգությունում, իսկ երրորդում՝ ռեփ է կարդում և պարում ֆրանսիացի երգիչ Նեկֆեուի ոճով։
Ինչ-որ պահի կադրում հայտնվում է իսկական Մակրոնը՝ կոստյումով և փողկապով և ասում. «Ավելի լուրջ՝ արհեստական ինտելեկտի օգնությամբ մենք կարող ենք շատ կարևոր բաներ անել՝ փոխել առողջապահությունը, էներգետիկան, մեր հասարակության կյանքը։ Ֆրանսիան և Եվրոպան պետք է լինեն այս հեղափոխության կենտրոնում՝ օգտվելու համար բոլոր հնարավորություններից և նաև առաջ մղելու մեր սկզբունքները»:
Տեսանյութի վերջում արհեստական Մակրոնը հայտնվում է ամերիկյան հեռուստատեսային մարտական ֆիլմի հերոս ՄակԳայվերի կերպարանքով, որը հայտնի է իր գեղեցիկ արտաքինով և ճարպկությամբ։ «Դե, դա հաստատ ես եմ»,- մեկնաբանում է իսկական Մակրոնը։
Մակրոնի Instagram-ի գրառումը հավաքել է ավելի քան 73,000 հավանում, որոշ օգտատերեր հիացել են նախագահի անկաշկանդ պահվածքից:
Նշենք, որ Նիկոլ Փաշինյանը փետրվարի 10-11-ն աշխատանքային այցով մեկնել է Ֆրանսիա, որտեղ կմասնակցի Արհեստական բանականության գործողությունների գագաթնաժողովին: Նախատեսված է նաև վարչապետի հանդիպումը Ֆրանսիայի նախագահ Էմանուել Մակրոնի հետ:
