Դեպի Բեյրութ չվերթեր են չեղարկվել հակամարտության սրման պատճառով

Qatar Airways-ը հայտարարել է, որ մինչև վաղը ժամանակավորապես դադարեցրել է թռիչքները դեպի Բեյրութ և հակառակ ուղղությամբ:

«Մեր ուղևորների անվտանգությունը մնում է մեր առաջնահերթությունը», — ասվում է AFP լրատվական գործակալության փոխանցած հաղորդագրությունում:

Այսօր առավոտյան Բեյրութի միջազգային օդանավակայանի ժամանման վահանակը ցույց է տվել մի քանի չեղարկումներ, այդ թվում՝ Turkish Airlines-ի չվերթերը Ստամբուլից, Air France-ինը Փարիզից և Royal Jordanian-ինն Ամմանից:

Գերմանական Lufthansa-ն, Air France-ը և Delta Air Lines-ը նույնպես վերջին օրերին դադարեցրել են թռիչքները դեպի Բեյրութ, ինչի հետևանքով տուժել են նաև դեպի Իսրայել և Իրան ավիափոխադրումներ իրականացնող որոշ ընկերություններ, հաղորդում է AFP-ն:

Անցյալ շաբաթ Qatar Airways-ը, ինչպես նաև Իրանի ազգային Homa ավիաընկերությունը, կապի սարքերի պայթյունների հետո արգելել են ուղևորներին փեյջերներ և ռադիոկապի սարքեր վերցնել դեպի Բեյրութ թռիչքների ժամանակ:

Իսրայելի օդային հարվածները Հեզբոլլահի վրա շարունակվել են գիշերը, հազարավոր մարդիկ Լիբանանի հարավում լքել են իրենց տները, հայտնում է BBC-ն։

Երկուշաբթի օրը Լիբանանի առողջապահության նախարարությունը հայտնել է, որ առնվազն 492 մարդ զոհվել է, ավելի քան 1645-ը վիրավորվել են, ինչը Իսրայել-Հըզբոլլահ հակամարտության ամենամահաբեր օրն է 2006 թվականից ի վեր:

Իսրայելի հյուսիսային շրջաններ ուղղված «Հեզբոլլահի» արձակած հրթիռները կա՛մ ոչնչացվել են, կա՛մ ընկել բաց տարածքներում, հայտնում է Իսրայելի պաշտպանության բանակը:

Իսրայելը հայտարարել է, որ «ընդլայնում է» իր հարվածները Հեզբոլլահի դեմ. Լիբանանի հարավում քաղաքացիներն այս շաբաթվա սկզբին հեռախոսային հաղորդագրություններ են ստացել՝ զգուշացումով հեռանալ այն վայրերից, որտեղ Հեզբոլլահի խմբավորմաններ կան տեղակայված։