Արդեն ավանդական դարձած մեր հանդիպումները «Երիտասարդական օպերային ծրագրի» ղեկավար Լևոն Ջավադյանի հետ որերորդ անգամ արձանագրում են ծրագրի մասնակիցների աննախադեպ հաջողությունները համաշխարհային հարթակներում, միջազգային մրցույթներում և հայաստանյան օպերային և համերգային հարթակներում:
Տասը տարուց ավելի գործող այս ծրագիրը լրջագույն խթան է հանդիսանում երիտասարդ մեներգիչների համար՝ նախ հղկելու սեփական կատարողական արվեստը, հարստացնելու երգացանկը և ճանապարհ հարթելու դեպի օպերային մեծ բեմ:
«Ի տարբերություն մեր սերնդի երգիչների, այսօր աննախադեպ լայն հնարավորություններ կան ճանաչվելու՝ միջազգային մրցույթներին մասնակցելով և Հայաստանում ու Հայաստանից դուրս տարբեր միջոցառումների մասնակցելու: Մեր ծրագրի սաները համալրում են Ազգային օպերային թատրոնի անձնակազմը, հրավիրվում են արտասահմանյան թատրոննների կողմից, մասնակցում են բազմաթիվ հեղինակավոր մրցույթների և բերում գլխավոր մրցանակներ: Ինչպես նաև Հայաստանի ներսում մասնակցում են ամենատարբեր համերգային ծրագրերի՝ հանդես գալով մայրաքաղաքի և մարզերի համերգային հարթակներում: Անցած տարի մեր սաների հաջողությունները աննախադեպ էին»,-ասում է Լևոն Ջավադյանը:
Մեր հանդիպման բուն առիթը հանդիսացավ նոյեմբերի 12-ին կայացած Ռուսաստանի Մեծ թատրոնի և Ա.Սպենդիարյանի անվան Օպերայի և բալետի ազգային ակադեմիական թատրոնի «Երիտասարդական օպերային ծրագրերի» մենակատարների շքեղ մենահամերգը: Ազգային օպերայի բեմում հանդես եկան երիտասարդ աստղեր Հայաստանից և Ռուսաստանից, լավագույն միջազգային մրցույթների դափնեկիրներ և հաղթողներ, որոնք հանդես եկան բազմաթիվ մեներգերով և անսամբլային կատարումներով՝ հանրաճանաչ օպերաներից:
Աննախադեպ են նաև մեր «Երիտասարդական օպերային ծրագրի» արտիստների հրավերները աշխարհի լավագույն թատրոնների կողմից՝ Ջուլիանա Գրիգորյանը նվաճելով «Օպերալիա» միջազգային մրցույթի գլխավոր մրցանակները՝ «Մետրոպոլիտեն» օպերայի կողմից հրավեր ստացավ: Նա մինչ այդ արժանացել էր Գրան Պրիի՝ «Մոնյուշկոյի» միջազգային 11-րդ վոկալ մրցույթում: Մեկ այլ կատարող՝ մեներգիչ Նավասարդ Հակոբյանը 2023-ին արժանացավ 3-րդ մրցանակի՝ Պլասիդո Դոմինգոյի «Օպերալիա» միջազգային օպերային մրցույթում: Մինչ այդ նա հրավիրվեց մասնակցելու Հյուսթոնի Գրանտ օպերային թատրոնի երիտասարդական ծրագրում: Նույն Հյուսթոն Գրանտ օպերայի երիտասարդական ծրագրի մասնակից դարձավ երգչուհի Անի Ղուշչյանը, Անին նույնպես մեր ծրագրի շրջանավարտ է: Գագիկ Վարդանյանը մասնակցելով Կլաուդիա Տաևի 13-րդ միջազգային մրցույթին՝ նվաճեց 3-րդ մրցանակը: Երիտասարդ երգչուհի Հեղինե Խաչատրյանը առաջին անգամ նոյեմբերի 10-ին հանդես եկավ Ադինայի դերերգով՝ Դոնիցետիի «Սիրո ըմպելիք» օպերայում:
«Ինձ համար մեծ հաջողություն է և պատիվ է միանալ «Երիտասարդական օպերային ծրագրի» թիմին: Ինտենսիվ պարապմունքները Լևոն Ջավադյանի և Իրինա Զաքյանի նուրբ ուղղորդմամբ՝ մեծ հնարավորություններ են բացում մեզ համար՝ ձևավորելու ոչ միայն օպերային մեներգերի, այլ նաև կամերային մեծ երգացանկ»,- ասում է մեր զրույցի մասնակից Հեղինե Խաչատրյանը:
Մենք հետևելու ենք ծրագրի ուսումնական ընթացքին՝ լուսաբանելով մասնակիցների առաջընթացը և ներկայացնելով նոր անուններ մեր ռադիոլսողին: