Հայաստանում արդեն ապաստան է գտել գրեթե ողջ արցախահայությունը` 100 հազարից ավելի մեր հայրենակիցներ։ Եվ Հայաստանի իշխանությունները, և հայաստանյան ու արատասահմանյան հասարակական ու քաղաքական շատ գործիչներ, և միջազգային մամուլը տեղի ունեցածը գնահատում են էթնիկ զտում։
Մինչդեռ մասնագիտական կառույցները` զորօրինակ Ցեղասպանության կանխարգելման Լեմկինի ինստիտուտը, տեղի ունեցածը որակում է հենց ցեղասպանություն։
Վերջին 30 տարում մենք աշխարհի տարբեր վայրերում տեսել ենք տարբեր ցեղասպանություններ` Ռուանդայում, նախկին Հարավսլավիայում, Հարավային Սուդանում, Մյանմայում, եզդիներինը` «Իսլամական պետության» կողմից իրականացված եւ այժմ Արցախում։ Ու կարծես ժամանակակից քաղաքակրթությունը անտարբեր ու նաեւ անզոր է կասեցնելու նման վայրագությունները։
Ավելին, Արցախի ցեղասպանությունը արդյո՞ք ազդանշան չէ, որ միջազգային հանրությունը ոչ միայն գերակա է համարում տարածքային ամբողջականությունը, այլեւ ինքնորաշման իրավունքի կասեցումը ընդունելի է համարում ուժի, անգամ ցեղասպանությունների եւ էթնիկ զտումների միջոցով։
Արմեն ՎԱՐԴԱՆՅԱՆ
Ցեղասպանությո՞ւն, թե՞ էթնիկական զտում. ո՞րն է տարբերությունը, ո՞րն է դրանց իրավական, քաղաքական ու քարոզչական հետեւանքները թեմայի մասին ենք խոսում Հանրային ռադիոյի հեղինակների հետ։ Տաղավարում են «Ձեր փաստաբանը» հաղորդման հեղինակ, իրավաբան Նարինե Սոլոմոնյանը, «Հասարակ գիտություն» հաղորդման հեղինակ, պատմաբան Միքայել Յալանուզյանը։