Օպերային արվեստում երիտասարդ հայազգի կատարողների հաջողությունների մասին խոսելիս՝ մենք հաճախ սահմանափակվում ենք Հայաստանում ծնված կամ բնակվող արտիստների հաջողությունները ներկայացնելով, այնինչ «հայկական աշխարհը» շատ ավելի տարածական է և ընդգրկուն, քան մեր երկրի ֆիզիկական սահմանները:
Տաթև Բարոյանը այն երիտասարդ հայ կատարողներից է, ով անկոտրում ուղի է բռնել դեպի օպերային հարթակներ՝ հաղթահարելով բազմաթիվ դժվարություններ և հասնելով իր տարիքի համար զգալի արդյունքների:
Ծնվելով Հայաստանում՝ պատանի հասակում ընտանիքի հետ տեղափոխվել է ԱՄՆ, բայց չի կորցրել կապը Հայաստանի հետ և շարունակել է կրթությունը հայտնի օպերային երգչուհի Հասմիկ Հացագործյանի դասարանում:
Ավարտելով Երևանի Պետական Կոնսերվատորիան՝ նա շարունակում է ուսումը Սարասոտայի օպերայի «Տեատրո նուովոյի» արտիստական ստուդիայի ծրագրի շրջանակում, ինչի արդյունքում կայանում է նրա դեբյուտը՝ Սարասոտայի օպերայի՝ Մոցարտի «Կախարդական սրինգ» օպերայում, Պապագենայի դերում:
2022-2023 թատերաշրջանում Նյու Յորք Սիթի Օպերայում նա ստանձնում է Վիոլետայի դերերգը՝ Վերդիի «Տրավիատա» օպերայում, ինչպես նաև՝ Բերտայի դերերգը «Սևիլյան սափրիչ» օպերայում:
Միաժամանակ Նյու Յորք Սիթի Օպերայում ստանում է դերերգ՝ Ռիկի Յան Գորդոնի «Ֆինցի-Կոնտինիի պարտեզը» ժամանակակից օպերայի պրեմիերայում: «Տեատրո նուովոյի» հետ համագործակցությունը նույնպես արդյունավետ է Տաթև Բարոյանի համար, նա երգում է Բելինիի և Ռոսինիի օպերաներում, ինչպես նաև կատարում է սոպրանոյի պարտիան՝ Ռոսինիի «Ստաբատ Մատեր» օպերայում:
Ժամանակի ընթացքում հարստանում է երգչուհու դերացանկը, որն ընդգրկում է Ցեռլինայի դերը «Դոն Ջիովանի» օպերայում, Մուսետտայի դերը «Բոհեմ» օպերայում և Լիուի դերը՝ «Տուրանդոտ» օպերայում:
Ինչպես նաև Անուշի դերերգը՝ Արմեն Տիգրանյանի համանուն օպերայում: Այդ շրջանը նաև հարուստ է բազմաթիվ կամերային համերգային ծրագրերով՝ Երևանում, Ֆլորիդայում և Նյու Յորքում, որոնք ընդգրկում են բազմաբնույթ երգացանկ՝ հայ և ռուս դասական երգերից մինչև արևմտաեվրոպական օպերային արիաներ:
Առավել մեծ նվաճումը Տաթև Բարոյանը համարում է իր մասնակցությունը Մետրոպոլիտեն օպերայի «Լաֆոնտ» մրցույթին, ուր 200-ից ավելի մասնակիցներից նա անցնում է եզրափակիչ փուլ՝ արժանանալով երկրորդ մրցանակին, որին հաջորդում է Ֆլորիդա նահանգի օպերային երգիչների մրցույթը և նվաճած առաջին մրցանակը:
Տաթև Բարոյանը նաև մասնակցել է «Օպերայի ապագան» մրցանակաբաշխությանը՝ դառնալով այդ մրցույթի ֆինալիստ և արժանանալով կրթաթոշակի: Սրան հաջորդում է նրա մասնակցությունը «Բաթումյան ռապսոդի օպերայի ոսկե ձայն» միջազգային մրցույթը, որի մրցանակակիր է դառնում:
Ընդհանուր առմամբ Տաթև Բարոյանը մասնակցել է ամենատարբեր օպերային մրցույթների, որոնց թվում են Հարավային Կարոլինա նահանգի Ազգային օպերայի մրցույթը և «Պրեմիեր Օպերա» հիմնադրամի միջազգային վոկալ մրցույթը:
Մինչև այցելելը Հայաստան՝ երգչուհին Զալցբուրգի օպերային թատրոնում աշխատեց մեկ թատերաշջան՝ 12 ներկայացում երգելով Իոլանտայի դերերգը՝ Չայկովսկու համանուն օպերայում:
Տաթև Բարոյանը հաճախ վարպետության դասեր է վերցնում հայտնի օպերային երգիչներից, մշտապես կատարելագործում մասնագիտական հմտությունները:
Հաղորդման ընթացքում հնչում են կամերային և օպերային դերերգերի՝ Տաթև Բարոյանի կատարումները:
