Հայաստանի դեմ միջանկյալ միջոց կիրառելու Ադրբեջանի խնդրանքը անկեղծ չէ և բավարար հիմքեր չի ներկայացնում՝ ասել է ՄԻԵԴ-ում Հայաստանի ներկայացուցիր Եղիշե Կիրակոսյանը ՄԱԿ-ի արդարադատության միջազգային դատարանում Ադրբեջանի կողմից ներկայացված միջանկյալ միջոցների մատնանշման հարցով հանրային լսումների ժամանակ իր եզրափակիչ ելույթում։
«Այն նախատեսված է կեղծ հավասարության տպավորություն ստեղծելու համար»,- ասել է Կիրակոսյանը։
«Հայաստանն իր բանավոր միջնորդության հիման վրա հարգանքով խնդրում է դատարանին՝ ամբողջությամբ մերժել միջանկյալ միջոցների կիրառման վերաբերյալ Ադրբեջանի խնդրանքը»,- ասել է նա։
Իր դիմումում Ադրբեջանը խնդրել է դատարանին ապահովել, որ «Հայաստանն անհապաղ ձեռնարկի բոլոր անհրաժեշտ քայլերը, որպեսզի Ադրբեջանին հնարավորություն ընձեռվի ձեռնարկել քաղաքների, գյուղերի և այլ տարածքների արագ, անվտանգ և արդյունավետ ականազերծում», այդ թվում՝ տրամադրելով տեղեկություններ ականների, պայթուցիկ թակարդների և այլ պայթուցիկ սարքերի գտնվելու վայրերի, քանակի, տեսակի բնութագրերը՝ «Ադրբեջանի ներքին տեղահանվածներին իրենց տները վերադառնալու հնարավորություն տալու համար»:
Այն նաև պահանջում է, որ Հայաստանը «դադարեցնի և ձեռնպահ մնա ցանկացած հետագա ջանքերից՝ ականներ և պայթուցիկ թակարդներ տեղադրելու այն տարածքներում, որտեղ ադրբեջանցի խաղաղ բնակիչները կվերադառնան»:
Հունվարի 30-ին դատարանում տեղի է ունեցել Հայաստանի կողմից ներկայացված խափանման միջոց կիրառելու պահանջի վերաբերյալ հանրային լսում։
Հայաստանի ներկայացուցիչը դատարանին դիմել է հետևյալ պահանջով.
- Ադրբեջանը պետք է դադարեցնի իր կազմակերպել կամ աջակցել ենթադրյալ «բողոքի ակցիաներին», որոնք արգելափակում են Լաչինի միջանցքի անխափան ազատ տեղաշարժը երկու ուղղություններով»։
- Ադրբեջանը պետք է ապահովի բոլոր մարդկանց, տրանսպորտային միջոցների և բեռների անխափան տեղաշարժը Լաչինի միջանցքով երկու ուղղություններով»։
- Ադրբեջանը պետք է անհապաղ վերականգնի և չխափանի կամ խոչընդոտի Լեռնային Ղարաբաղին բնական գազի և կոմունալ այլ ծառայությունների տրամադրումը։
Ժամանակավոր միջոցների կիրառման երկու դիմումների վերաբերյալ էլ Դատարանի որոշումները կհրապարակվեն հանրային նիստում, որի օրը կհայտարարվի ընթացակարգի համաձայն։
