Քննարկվում է Հայաստանի տարածքի կողմից Հայաստան-Ադրբեջան սահմանին նաև ԵԱՀԿ դիտորդներ գործուղելու հարցը, այսօր ճեպազրույցում հայտարարել է ՀՀ ԱԳ նախարար Արարատ Միրզոյանը:
«Քննարկվում է ՀՀ տարածքի կողմից Հայաստան-Ադրբեջան սահմանին նաև ԵԱՀԿ դիտորդներ գործուղելու թեման: Մոտ ապագայում հստակություն կունենանք»,-ասել է Միրզոյանը՝ պատասխանելով հարցին, թե Հայաստանն ինչ ակնկալիքներ ունի ԵՄ քաղաքացիական առաքելությունից։
«Ակնկալում ենք միջազգային դերակատարում Հարավային Կովկասում և, մասնավորապես, Հայաստան-Ադրբեջան սահմանին խաղաղության հաստատման գործում:
Մեր ակնկալիքներն են, որ ԵՄ առաքելությունը որոշակի փաստահավաք մաս կունենա, և այդ փաստերը կվկայեն Հայաստանի պնդումները, որ տեղի է ունեցել ագրեսիա ՀՀ ինքնիշխան տարածքի նկատմամբ, և կա ադրբեջանական զորքերի ներխուժում ՀՀ միջազգայնորեն ճանաչված տարածք, համապատասխանում են իրականությանը»,- ասել է Միրզոյանը:
Ինչ վերաբերում է ՀԱՊԿ դիտորդներին, Միրզոյանը նշել է․
«Դիմել ենք ՀԱՊԿ-ին, որին անդամակցում ենք: Այդ կազմակերպությունում որոշում է կայացվել նախնական փաստահավաք առաքելություն ուղարկել: Եկել են պաշտոնյաները, իրենց արձանագրումների հիման վրա զեկույց են պատրաստել, այն ներկայացված է բոլոր անդամ-պետություններին: Զեկույցի հիման վրա քարտուղարությունը որոշման նախագիծ է շրջանառել, մենք բանավոր քննարկումներով փորձել ենք հասկանալ՝ երբ կարող է տեղի ունենալ ՀԱՊԿ խորհրդի նիստը, որտեղ երկրների ղեկավարները կարող են քննարկել նաև այդ առաքելության գործուղումը: Այս փուլում ենք այժմ: Որոշում չկա, քննարկումներ կան»:
Նա չափազանց կարևորեց իրավիճակի քաղաքական գնահատականը:
«Մեզ նախևառաջ պետք է հասկանալ՝ որքանով է կազմակերպությունը ճանաչում այս իրավիճակը»,-ասել է ՀՀ ԱԳ նախարարը:
