ԿԳՄՍ նախարարության աջակցությամբ մայիսի 30-ից հունիսի 15-ը Երևանում, Գյումրիում և Արտաշատում կանցկացվի «Արմմոնո» 19-րդ միջազգային թատերական փառատոնը։ 2003 թվականից իրականացվող փառատոնի հիմնադիրը Հայաստանի թատերական գործիչների միության նախագահ Հակոբ Ղազանչյանն է։
Փառատոնի տնօրեն Մարիաննա Մխիթարյանի խոսքով՝ այս տարի հանդիսատեսը հնարավորություն է ունենալու դիտել 20-ից ավելի ներկայացում: Փառատոնի բացումը տեղի է ունենալու Թատերական գործիչների միությունում մայիսի 30-ին «Կարմիր ծաղիկ» ներկայացմամբ, որի բեմադրության հեղինակը Գեղարքունիքի մարզի Լևոն Քալանթարի անվան դրամատիկական թատրոնի գլխավոր ռեժիսոր Արմեն Սաֆարյանն է:
Համավարակի պատճառով փառատոնն այս տարի դրսից հյուրեր չի ունենալու, բայց տնօրենը կարծում է, որ այն հայ թատերական գործիչներին ու դրամատուրգներին համախմբելու լավ հնարավորություն է դառնալու։ ․
«Ուզում եմ ասել, որ այս տարվա Արմոնոյի թիրախում մարզային թատորններն են, այդ իսկ պատճառով Գավառի թատրոնի բեմադրիչ Արմեն Սաֆարյանի բեմադրությամբ է բացվում փառատոնը։ Երբ սահմանները բացվեն, մենք արդեն կունենանք հավաքագրված պաշար թատերական ներկայացումների և աշխարհին ցույց կտանք մեր տեղն արվեստում»,-ասում է Մարիաննա Մխիթարյանը։
