Նախորդ գիշեր Տավուշում դիվերսիոն ներխուժման հերթական տապալված փորձից հետո ադրբեջանական զինված ուժերը փորձել են վրեժ լուծել հայ խաղաղ բնակիչներից՝ հրետակոծելով մի քանի սահմանային գյուղեր: ՊՆ ներկայացուցիչ Արծրուն Հովհաննիսյանը, Հայկական միասնական տեղեկատվական կենտրոնում ներկայացնելով օպերատիվ իրավիճակը, շեշտեց, որ հայկական կողմից կորուստներ եւ վիրավորներ չկան: Հերքեց նաեւ ադրբեջանական լրատվամիջոցների տարածած տեղեկությունը հայկական անօդաչու թռչող սարքի կորստի մասին: Փոխարենը՝ հստակ է, որ թշնամին կրել է թե տեխնիկական, թե մարդկային կորուստներ։
«Դիտարկվող կորուստները կարող է և մոտենան մեկ, երկու տասնյակին, բայց հստակ չեմ կարող ասել, չէի ուզենա պնդել մի բան, որ հետո դժվար լիներ ապացուցել: Կսպասենք հակառակորդի հաստատմանն, ըստ այդմ ավելի մոտավոր կհասկանանք. սովորաբար մոտավորապես գիտենք իրենց ստելու չափաբաժինը: Հայկական կողմից գիշերվա ընթացքում զոհեր ու վիրավորներ չունենք»։
Առավոտյան ադրբեջանական զինուժը թիրախավորել է Այգեպար, Ներքին Կարմիրաղբյուր, Չինարի, Մովսես, Տավուշ գյուղերը և Բերդ քաղաքը: Տավուշի մարզպետ Հայկ Չոբանյանի տեղեկացմամբ՝ բնակավայրերում վնասվել են տասից ավելի առանձնատուն և որոշ ենթակառուցվածքներ:
«Այս պահի դրությամբ հարաբերական անդորր է: Առավոտյան մեր բնակավայրերում վնասվել են տասից ավել առանձնատուն և որոշ ենթակառուցվածքներ: Առանձնահատուկ ուզում եմ նշել սահմանապահ Այգեպարի մանկապարտեզի ռմբահարումը, վնասվել է ջրագիծ Տավուշ-Ներքին Կարմիրաղբյուր հատվածում, որի վերականգման աշխատանքներն ընթացքի մեջ են: Վաղ առավոտյան մոբիլիզացվել են մարզի քաղպաշտպանության բոլոր խմբերը, և ինտենսիվ աշխատանքներ են ընթանում քաղաքացիական բնակիչների անվտանգությունը ապահովելու համար: Հայտարարել ենք ներքին մոբիլիզացիա պատսպարման առումով, և մեր քաղաքացիները գտնվել են հիմնականում ապաստարաններում և նկուղներում: Բարեբախտաբար, քաղաքացիական բնակչության մեջ վիրավորներ և զոհեր չունենք»:
Մարզպետը տեղեկացրեց, որ կառավարության հետ քննարկումների արդյունքում ստեղծվել է հրետակոծված բնակավայրերի շինությունների գնահատման ու գույքագրման հանձնաժողով, որն ամենօրյա ռեժիմով կգնահատի վնասների չափն ու ծավալը։
«Վաղվանից կզբաղվենք վերականգման աշխատանքներով, այն բնակարանները, որոնց վերականգնումը նպատակահարմար չի լինի, կկառուցվեն նորերը: Այն բնակիչները, ում բնակարանները վնասվել են, թող անհոգ լինեն, մենք սեղմ ժամկետում լուծելու ենք իրենց բնակարանների վերականգման հարցը: Կարևոր է, որ բնակիչները պահեն զգոնությունը, քաղպաշտպանության բոլոր կառույցները զգոն աշխատեն, որովհետև ցանկացած պահի իրավիճակը կարող է փոխվել, ընդ որում՝ ցանկացած բնակավայրում: Այսօր առանձնահատուկ խնդրել ենք, որ մարդիկ պատսպարված մնան, իրավիճակը կայուն է, վերահսկողության ներքո է, և բանակի պրոֆեսիոնալ վարքագծի շնորհիվ ավելի հանգիստ ենք զգում մեզ մեր գյուղերում և քաղաքներում»:
Արձագանքելով հարցերից մեկին՝ Արծրուն Հովհաննիսյանը նշեց, որ Տավուշի ուղղությամբ ադրբեջանական հարձակումների սկսման առաջին երկու օրերի համեմատությամբ, ընդհանուր առմամբ, օդում թշնամու ակտիվությունն այսօր իջել է:
«Ես երեկ հայտարարեցի, որ Հայաստանի Զինված ուժերը դիտարկում և տեսնում են օդային և ցամաքային տիրույթը, պատրաստ են ջախջախիչ հարված տալ հակառակորդի օդային և ցամաքային հարձակումներին»։
Այսօր առավոտ էլ մենք փաստեցինք այդ ջախջախումը՝ եզրափակեց ՊՆ ներկայացուցիչ Արծրուն Հովհաննիսյանը:
