Կորոնավիրուսի հետ կապված սահմանափակումները մարտի 10-ից տարածվում են ամբողջ Իտալիայի տարածքում. այդ մասին հրամանագիր է ստորագրել է Իտալիայի վարչապետ Ջուզեպպե Կոնտեն:
Մարտի 7-ի լույս 8-ի գիշերը Լոմբարդիայի և ևս 14 նահանգների համար կառավարության ձեռնարկած միջոցներն ուժի մեջ կմտնեն ամբողջ երկրի տարածքում: Սահմանափակումները արգելում են տեղաշարժը, բացառությամբ արտակարգ դեպքերի, մասնավորապես, բժշկական պատճառներով:
Այսպիսով կառավարությունը փորձում է կանգնեցնել երկրում կորոնավիրուսի արագ տարածումը: Մարտի 9-ի դրությամբ, ըստ Իտալիայի քաղաքացիական պաշտպանության, վարակվել է 9172 մարդ, որոնցից 463-ը մահացել է, առողջացել է 724-ը, ավելի քան 700-ը ինտենսիվ բուժման փուլում է:
Վարչապետ Ջուզեպպե Կոնտեն հայտարարել է, որ վիրուսի տարածմանը դիմակայելու «ժամանակ չունեն». «Բոլորս պետք է հրաժարվենք ինչ-որ բաներից, որպեսզի պաշտպանենք քաղաքացիների առողջությունը … Հետևաբար, մեր սովորությունները պետք է փոխվեն: Դրանք պետք է հիմա փոխենք: Ես պատրաստվում եմ ստորագրել հրամանագիր, որը կարող ենք անվանել այսպես՝ « ես տանն եմ մնում », — ասել է Կոնտեն:
Իտալիայի ղեկավարը նաև հայտնել է, որ Սերիայի A ֆուտբոլային առաջնությունը և երկրում անցկացվող բոլոր մարզական իրադարձությունները կդադարեցվեն, Իտալիայում բոլոր դպրոցները կփակվեն մինչև ապրիլի 3-ը: Դասընթացներ չեն անցկացվի նաև համալսարաններում:
Մարտի 10-ից սկսած, բարերը, ռեստորանները, պանդոկներն ու դիսկոտեկները Իտալիայում պետք է փակվեն 18:00-ին: Արգելվում են տոնակատարությունները՝ ներառյալ հարսանիքները և հուղարկավորությունները: Թանգարանները, թատրոններն ու կինոթատրոնները չեն գործելու:
Հասարակական տրանսպորտի շարժը չի դադարեցվելու, շեշտել է վարչապետը:
Մարտի 8-ին հայտնի դարձավ, որ Իտալիան աշխարհում առաջինն է կորոնավիրուսով վարակված մարդկանց մահացության քանակով: Ըստ վիճակագրության՝ յուրաքանչյուր 20-րդ հիվանդը մահանում է:
COVID-19- ից մահացության առումով երկրորդ տեղում Իրանն է ՝ 2.96%, երրորդ տեղում ՝ Չինաստանը ՝ վարակվածների ընդհանուր թվի 3,83%:
Նախկինում անհայտ բետա-կորոնավիրուսային SARS-CoV-2- ը, որը թոքաբորբ է առաջացնում, առաջին անգամ հայտնվել է դեկտեմբերի վերջին՝ Ուուհան քաղաքում (Չինաստան): Մինչ օրս աշխարհում ավելի քան 109 հազար մարդ է վարակվել, մահացել է մոտ 3,8 հազարը, բուժումից հետո առողջացել է ավելի քան 62 հազար մարդ:
