Աիդա Ավետիսյան
«Ռադիոլուր»
Թիվ 16 հատուկ դպրոցում բողոքի ակցիա էին կազմակերպել ուսուցչական կազմն ու ծնողները: Սեպտեմբերը բարի չի եղել նրանց համար: Մի քանի ամիս առաջ ուսուցչական կազմը ստացել է հատուկ դպրոցը հանրակրթական դառնալու ծանուցումը, սակայն կառավարության որոշում դեռ չկա:
Որոշում չկա, բայց դպրոցին հատկացվող գումարը կրճատվել է, այսինքն գիշերօրթիկ հաճախող երեխաները այլևս կեցության խնդիր են ունենում: Նախարարությունից մեկնաբանում են, որ օրենսդրության համաձայն գիշերօթիկ դպրոց հասկացություն չկա և այդպիսի դպրոցներ չեն լինելու:
Մարիաննան ու Սևակը այլևս հնարավորություն չեն ունենա իրենց կրթությունը շարունակելու 16 հատուկ դպրոցում, քանի որ ՀՀ օրենսդրության համաձայն`գիշերօթիկ դպրոց հասկացություն այլեւս չկա, հանրապետությունում նման դպրոց չի լինելու:
«Միայնակ մայր եմ ու իմ երկու երեխաներն արդեն երրորդ տարին է այստեղ են սովորում: Մեզ ինչու չեն հարցնում՝ մենք ուզո՞ւմ ենք ուրիշ դպրոց սովորել, թե՞ ոչ: Աղջիկս տեսողական խնդիրներ ունի, իսկ տղաս՝ հոգեբանական: Ի շնորհիվ այստեղի՝ անձնակազմի իմ երեխան հիմա հանգիստ դասի է նստում: Իսկ հիմա, որ ասում եմ ուրիշ դպրոց եք գնալու, լաց են լինում»:
Թիվ 16 հատուկ դպրոցին մայիսին կրթության, գիտության, մշակույթի և սպորտի նախարարությունից գրավոր ծանուցել են, որ համընդհանուր ներառականության շրջանակներում այս դպրոցը դառնալու է թիվ 201 հանրակրթական դպրոց: Մշակվել է նախագիծը: Սակայն դեռևս որոշում չկա: Բայց սեպտեմբերի մեկի նախօրյակին նախարարությունից նորանշանակ տնօրեն Մարիամ Շոլինյանին հանձնարարել են աշխատել ուսուցիչների, ծնողների հետ և երեխաներին ուղարկել այլ դպրոցներ, քանի որ սա որպես հատուկ դպրոց չի գործելու:
«Դա պետք է գոնե մի քանի ամիս առաջ ասեին, նախապես ասեին: Կամ դուք ինձ որոշում տվեք: Գրավոր որևէ բան չկա, հանձնարարական չկա»:
2002 թվականից դպրոցը վերակազմավորվել է և այստեղ սովորում են տեսողական խնդիրներ ունեցող, ծնողազուրկ, ծնողական խնամքից զրկված երեխաներ: Մինչև հիմա կրթօջախն ունեցել է 170 երեխա և բոլորն էլ վկայագրված են եղել որպես կրթության առանձնահատուկ կարիքներ ունեցող երեխաներ՝ ասում է նորանշանակ տնօրենն ու հավելում՝ մանկավարժահոգեբանական կենտրոնը վերջերս վերագնահատում է կատարել, ինչ արդյունքներով 170- ից 19-ն ունեն տեսողական խնդիրներ։ Վերագնահատման հիման հիման վրա դպրոցը գիշերօթիկի ֆինանսավորում չի ստանալու:
«Ուսումնական գործընթացը պարտավոր եմ կազմակերպել: Կազմակերպել եմ, բայց թե ուսուցիչները աշխատավարձ կստանան թե՝ ոչ, դա պարզ չէ: Իսկ գիշերօթիկ երեխաների հարցն ինչպես է լինելու, դա էլ չգիտեմ»:
Կրթության, գիտության, մշակույթի և սպորտի նախարարության հանրակրթության վարչության պետ Աշոտ Արշակյանը « Ռադիոլուրի» հետ զրույցում նշում է, որ դպրոցի երեխաները վերագնահատվել են և մոտ 100 երեխա չունի կրթության առանձնահատուկ պայմանների կարիք կամ չի համապատասխանում դպրոցի պահանջներին:
«Ճիշտ չէ, բոլորը վկայագրեր չունեն: Ոչ մի երեխա վկայագիր չունի: Ձեր նշած վկայագրերը նախկին վկայագրերն են, վերագնահատումը նոր է ավարտվել և դեռ որևէ մեկը վկայագիր չունի»:
Իսկ տնօրենի՝ դպրոցի ծախսերի հետ կապված մտահոգությունները ոլորտի պատասխանատուն փարատում է:
«Խնդրել եմ տնօրինությանը, որ իրականացնեն կոմպլեկտավորում, նախարարություն ներկայացնեն նախահաշիվ, ինչի հիման վրա էլ դպրոցը կֆինանսավորվի, մինչև որ կլինի կառավարության որոշումը»:
Ուսուցչական անձնակազմի պահանջն է ամեն ինչ իրականացնել օրենսդրական դաշտում: Առաջարկն է կառավարության որոշումից հետո նոր կրճատել ֆինանսավորումը:
«Քանի դեռ 16 հատուկ է որևէ փոփոխություն չկա, մեզ ֆինանսավորեք կյանքը բնականոն հունով գնա, մինչև որ որոշումը կլինի»:
Իսկ գիշերօթիկ երեխաների հարցով պետք է զբաղվեր սոցապ նախարարությունը: Դպրոցում կա 40 գիշերող երեխա և նախապես պետք է այդ երեխաների կեցության հարցերին տրվեր լուծումներ, որ սեպտեմբերին նրանք չկանգնեին փաստի առջև՝ վրդովված դժգոհում է տնօրենը: Իսկ հանրակրթության վարչության պետը նշում է պետք է գնահատել յուրաքանչյուրի սոցիալական կարիքները: Երեխաները կարող են մնալ այնտեղ, որտեղ անցկացրել են ամառային արձակուրդները:
