Հունվարի 1-ից ակցիզային հարկի ավելացմամբ պայմանավորված թանկացել են սեղմված գազը, դիզվառելիքը, քսանյութերն ու բենզինը: Վառելիքի թանկացման բեռը կնկատվի գրեթե բոլոր ոլորտներում:
Թեև գյուղատնտեսության նախարարությունում կատարված հաշվարկների համաձայնայն էականորեն չի ազդի գյուղմթերքի ինքնարժեքի վրա, սակայն գյուղատնտեսները պնդում են, որ կթանկանան և՛ մթերքը, և գյուղատնտեսական աշխատանքները, կխոչընդոտվի տեղական մթերքի արտահանումը:
Դիզվառելիքի գյուղատնտեսության վրա հնարավոր ազդեցությունների մասին մանրամասնում է «Ռադիոլուրը»:
Սեղմած գազի, դիզվառելիքի և բենզինի թանկացումն իրենց վրա կզգան ոչ միայն վարորդները, այլեւ գյուղատնտեսությամբ զբաղվողները։ Եթե բենզինը հունվարից թանկացել է 30 դրամով, ապա դիզվառելիքի գինը, Ագրարագյուղացիական միավորման նախագահ Հրաչ Բերբերյանի դիտարկմամբ, բարձրացել է 60 -ով: Իսկ առջևում գարնանացանն է:
«Էս ինչ հարված են տալիս գյուղատնտեսությանը, թե ընդհանրապես ուզում են մեզ մոտ միշտ գյուղմթերքը ներկրեն: Սա կարծում եմ, որ առանց մտածելու արված քայլ է: Սա գյուղատնտեսության վերջը կլինի»:
Խնձորի հսկայական այգիներ ունեցող օհանավանցի Արտյոմ Նավասարդյանը դժգոհում է նախորդ տարիների կարկուտից կրած վնասներից, գյուղնախարարության ոչ ճիշտ հաշվարկներից ու փոխհատուցումից: Այսօր դժգոհությանը գումարվում է դիզվառելիքի թանկացումը։ Դա կզգացվի հողագործական աշխատանքներն ժամանակ:
«Մի շարքը, որը կազմում է 600 քմ մետր, բուժումը կատարում էին 1000 դրամ: Հիմա ավելի թանկ կլինի, քանի որ դիզվառելիքը թանկացել է: Դա այն ժամանակ եմ ասում, որ դիզվառելիքը 7000 դրամ էր»:
Եթե այգեպան Արտյոմ Նավասարդյանը հաշվարկները ներկայացրեց խնձորի այգիների դեպքում, ապա Ագրարագյուղացիական միավորման նախագահ Հրաչ Բերբերյանը հողերի վար ու ցանքի իր հաշվարկներն է ներկայացնում։
«Եթե նախկինում վարը կատարվում էր 25.000 դրամով, ապա այս թանկացման արդյունքում նույն աշխատանքը կկատարվի 35.000 դրամով»:
Ավելին, Հրաչ Բերբերյանը նշեց, որ թանկացումը կխոչընդոտի տեղական արտադրանքի արտահանմանը, ավելին՝ կխթանի ներմուծմանը
«Եթե ռուսաստանյան ֆերմերին 30-40 տոկոսով սուբսիդավորում են դիզվառելիքը, բնականաբար ինքնարժեքը ցածր է: Ուրեմն վաղը Կրասնոդարի, Աստրախանի լոլիկը լցնելու են Հայաստան»:
Սակայն գյուղատնտեսության փոխնախարար Ռոբերտ Մակարյանը, հենվելով նախարարության հաշվարկների վրա, պնդում է դիզվառելիքի թանկացումն էականորեն չի ազդի գյուղմթերքի ինքնարժեքի վրա:
«Այսօրվա հաշվարկներով այս պայմաններում դիզվառելիքի թանկացումն էական ազդեցություն չի կարող ունենալ գյուղմթերքի ինքնարժեքի վրա: Մեր մասնագետների հաշվարկների համաձայն՝ լոլիկի, խաղողի մասով մինչև 1-2 դրամի է հասնելու: Այսինքն՝ անհանգստանալու խնդիր չունենք: Բայց սոցիալապես անապահով խավերին աջակցելու համար կա հանրապետության նախագահի հանձնարարականը։ Եթե ռիսկային լինի, մենք պատրաստ ենք սուբսիդավորման քաղաքականությունը շարունակել»:
Ագրարագյուղացիական միավորման նախագահը վստահեցնում է, որ իրենք պայքարելու են դիզվառելիքի թանկացման դեմ, սակայն չմանրամասնեց՝ ինչպես եւ ինչ քայլեր են ձեռնարկելու:
