ԱՄՆ Հարվարդի համալսարանի բժիշկների հետազոտությունների համաձայն՝ շաքարի բարձր պարունակությամբ մրգային հյութեր պարբերաբար խմող երեխաները հաճախ տառապում են ասթմայով:
Ճարպակալման և ասթմայի կապից բացի հայտնաբերվել է, որ քաղցր ըմպելիքների և մեծ քանակությամբ ֆրուկտոզայի գործածությունը նույնպես բարձրացնում է այս հիվանդության առաջացման ռիսկը:
«Ռադիոլուր»-ի բնական հյութերի հնարավոր վնասների մասին զրուցել է հայ մանկաբույժի հետ և նաև մեկտեղել ծնողների կարծիքներ:
Շաքարը չի մտնում այն պարտադիր սննդատեսակների մեջ, որոնք անհրաժեշտ են թե՛ մեծերին, թե՛ փոքրերին: Հատկապես մինչև մեկ տարեկան փոքրերին մանկաբույժները խորհուրդ չեն տալիս շաքարային պարունակությամբ որևէ հյութ տալ:
Դրան կարող են փոխարինել մրգային խյուսերը: Մանկաբույժ Լիլիթ Մարությանն ինքն էլ է հասկանում, որ երեխաներին հնարավոր չէ ընդհանրապես զրկել քաղցրից, սակայն խորհուրդ է տալիս սահմանափակել հատկապես քաղցրահամ հյութերը: Իր մասնագիտական գործունեության ընթացքում զրուցակիցս շատ է հանդիպել մայրերի, որոնք քաղցրահամ հյութերով հագեցնում են երեխաների կամակորությունը:
Սակայն քաղցրահամ հյութերի չարաշահումը բացասական ազդեցություն է ունենում օրգան համակարգերի վրա:
Վերգինե Պետրոսյանին հանդիպեցի պոլիկլինիկաներից մեկում։ Երեխաների հետ հերթական այցի էր եկել մանկաբույժի մոտ: Հյութերի վնասակարության մասին զրուցելու ընթացքում նշեց, որ իր երեքամյա տղայի համար ջրից հետո հաջորդ կենսական հեղուկը կոկա-կոլան է: Մեծերը չեն կարողանում հրաժարվել դրանից, իսկ փոքրի աչքից էլ չի վրիպում դրա գոյությունը:
«Տանը սերկևիլի, դեղձի կոմպոտներ պատրաստում եմ, բայց չի խմում: Կոլա է ուզում: Ճիշտ է փորձում եմ չտալ, բայց երբ տանը տեսնում է չենք կարողանում չտալ»:
Մանկաբույժն էլ հյութերից երեխաներին կտրելու ճանապարհը տեսնում է ընտանեկան համախմբվածության մեջ: Եթե երեխային ուզում են հետ պահել «գրավիչ» հյութերից, ուրեմն առաջին քայլ կատարողը պետք է մեծը լինի՝ ասում է:
«Մենք միշտ ասում ենք, որ եթե սննդակարգի մասին է խոսքը, բոլորդ պետք է հետևեք խորհուրդներին: Եթե տանը կա քաղցր ըմպելիք, երեխային ասել, որ սա քեզ չի կարելի, անմտություն է: Մեկ-երկու օր և երրորդ օրը նա կսկսի նորից օգտագործել»:
Մյուս զրուցակցիս համար տարօրինակ թվաց մանկահասակ երեխաների ծարավը զովացուցիչ ըմպելիքներով հագեցնելը, սակայն նաև չէր ընդունում տան պայմաններում պատրաստված բնական հյութերի վնասակարությունը։ Հյութը երեխայի օրգանիզմի համար կարևոր է՝ ասում է:
«Քանի որ իմ տղան ունի հեմոգլոբինի խնդիր, մենք ամեն օր խմում ենք գազարի, խնձորի, բազուկի հյութ և նաև խնձորով ու սև չամիչով առանց շաքար պատրաստված հյութը: Որպես ծնող նախընտրում եմ ինքս պատրաստել»:
Տան պայմաններում բնական մրգերից հյութաքամիչով պատրաստած հյութերը նույնպես պետք է սահմանափակել: Մանկահասակ երեխաներին օրական թույլատրվում է խմել 125-250 մլ հյութ:
«Անգամ այդպես տրվող հյութն ածխաջուր է, իսկ շատ քանակությամբ ածխաջուրը վտանգավոր է»:
Ատամնաբույժները հորդորում են քաղցրն օգտագործել ուտելուց հետո, երբ արդեն բերանում միկրոֆլորան ինչ- որ չափով խախտվել է: Սրան զուգահեռ պետք է պահպանել նաև ատամների խնամքը: Այնուամենայնիվ ամենաանվտանգ ու կենսական անհրաժեշտ հեղուկը բոլորի համար շարունակում է մնալ ջուրը:
