Մարտունու տարածաշրջանի Արծվանիստ համայնքի արտագնա աշխատանքի մեկնողների ընտանիքների հոգսերն ու առանձնահատկությունները, նրանց շրջանում տխուր օրիանաչափություն դարձած սերնդափոխությունը: Գեղարքունիքի մարզի Արծվանիստ համայնք կատարած այցի ընթացքում «Ռադիոլուր»-ը պարզել է, որ այստեղ նաև դպրոցականներն են մեկնում արտագնա աշխատանքի, և դա համայնքում միանգամայն բնական են համարում:
Ընտանիքի չորրորդ երեխան էր նա, ծնողներն անվանակոչեցին Բավական՝ ասելով, թե վե՛րջ, այսքանով ավարտում ենք, բավական է: Արծվանիստցի տիկին Բավականն ինքը երկու զավակ ունի՝ աղջիկ, տղա: Աղջիկն ամուսնացած է, որդին՝ ծառայում է՝ Արցախում: Ծառայությանը հաշված օրեր են մնացել, վերդառնալու է: Սպասումի ծանր ապրումները տիկին Բավականը լցնում է գյուղական առօրյայի ծանր հոգսերով, կարոտի դեմ պայքարում միայն դա է օգնում, չնայած կարոտի ու սպասումի ապրումները նրան խորթ չեն. ամուսինը Արծվանիստի, ինչպես ինքն է ասում՝ ստաժավոր խոպանչիներից մեկն է։Նորաձևության հեղափոխական շունչը Արծվանիստում զգացվում է. երիտասարդ հարսների շրջանում քիչ չեն ընբոստները. ոչ հողամաս, ոչ անասաուն, ոչ էլ թոնրի հաց: «Հանգիստ կյանքով են ուզում ապրել»,-ասում է տիկին Բավականը՝ խոստովանելով՝ ինքը հեղափոխական հովերից հեռու է:
Ամուսինն այս տարի կվերադառնա ու, հավանաբար, այլևս չի մեկնի արտագնա աշխատանքի, սակայն տիկին Բավականի ամուսնուն Ռուսաստանում կփոխարինեն երիտասարդ արծվանիստցիները, սերնդափոխությունն, ինչպես պարզեցինք, այս ոլորտում էլ օրիանաչափություն է, երբեմն ՝ շատ տխուր օրինաչափություն: 82-ամյա Մուշեղ պապը 15-ամյա թոռանը վերջերս է ճանապարհել Ռուսաստան: Դպրոցին կփոխարինի արտագնա աշխատանքը: Տանը դա շատ բնական են համարում։
Մուշեղ պապի հարևանին անկեղծորեն զարմացրեց իմ զարմանքը՝ ինչպես կարելի է երեխային դպրոցից հանել ու ուղարկել արտագնա աշխատանքի։
15-ամյա տղայի մայրը չորս երեխա ունի, արտագնա աշխատանքի մեկնած Արսենը ավագն է, այսօր արդեն ընտանիքի հույսը: «Ինչ գործ էլ պատահի կանի, մյուսների նման»,-ասում է Արսենի մայրը։
«Տղաս չէր սովորում դպրոցում, սովորողներն էլ վերջում էլի նույն գործն են անում Ռուսաստանում, ինչ տարբերություն». մեր զրույցը զարմանքով ու փոքր ինչ վրդովված եզրափակեց Արսենի մայրը։
