Փաստաբանների պալատի մի խումբ անդամներ մտադիր են դիմել բողոքի ծայրահեղ միջոցի՝ գործադուլի` այդպես արտահայտելով իրենց բողոքի դատարաններում ու քրեակատարողական հիմնարկներում զննության՝ վերջին շրջանում խնդրահայուց դարձած պրակտիկայի դեմ: Փաստաբան Երվանդ Վարոսյանն այսօր «Ռադիոլուր»-ին ասել է, որ խոսքն արդեն ոչ թե մտադրության, այլ հստակ որոշման մասին է, որի մասին պաշտոնապես կհայտարարվի առաջիկայում: Հնարավոր գործադուլը կնախորդի ՓՊ նախագահի ընտրություններին, որին կառույցը գնում է համարյա պառակտված կամ ներքին հակասությունները չհաղթահարած:
«Այս պահին 90 փաստաբան միացել է նախաձեռնությանը, բայց փաստաբանները դեռ շարունակում են ծանոթանալ հայտարարությանը ու ներկայացնել իրենց դիրքորոշումը»:
Գործադուլի միջոցով փաստաբաններն իրենց բողոքն են արտահայտելու վերջին շրջանում դատարաններում խնդրահարույց դարձած զննության-խուզարկության պրակտիկայի դեմ: Դատավարությունների ժամանակ պարբերաբար խնդիրներ են առաջանում դատական կարգադրիչների և փաստաբանների միջև. փաստաբանները պնդում են, որ իրենք ոչ թե զննության են ենթարկվում նիստերի դահլիճ մտնելուց առաջ, որի իրավունքը դատական կարգադրիչներն ունեն, այլ՝ խուզարկության, որի իրավունքը նրանք չունեն:
«Սա հակազդեցություն է ստեղծված իրավիճակին, իսկ իրավիճակը տարօրինակ է: Չգիտես ինչու ում մտքով անցել է, որ փաստաբանները կարող են վտանգ ներկայացնել և նրանց պետք է զննել: Անկախացումից ի վեր երբեք փաստաբանների նկատմամբ նման մոտեցում չի ցուցաբերվել: Չկա որևէ նախադրյալ փաստաբանների նկատմամբ նման մոտեցում որդեգրելու համար, և բնական է, որ մենք մեր բողոքի ձայնը պետք է բարձրացնեինք»:
Երվանդ Վարոսյանն ասում է, որ երաշխիք չունեն, թե գործադուլը կհանգուցալուծի իրավիճակը, բայց նաև համոզված են, որ լռելը ճիշտ չէ: Ի դեպ, հնարավոր գործադուլը կնախորդի Փաստաբանների պալատի նախագահի ընտրությանը: Այն նախատեսված է սեպտեմբերի 9-ին, միակ թեկնածուն պալատի գործող նախագահ Արա Զոհրաբյանն է: Այս ընտրություններին պալատը գնում է՝ համարյա պառակտված ու ներքին հակասությունները չհաղթահարած: Կառույցի գործող նախագահն այլախոհների լուրջ թիմ ունի, որը կարծում է, որ պալատը վերածվել է անդեմ ու անառողջ կառույցի: Երվանդ Վարոսյանը այդ թևի ներկայացուցիչն է: Պատասխանելով հարցին, թե պալատի ընդդիմադիր թևն ինչու այլընտրանքային թեկնածու չառաջադրեց, Երվանդ Վարոսյանն ասում է, որ ընտրություններին մասնակցելն անիմաստ են համարում:
Պալատի նախագահ Արա Զոհրաբյանը, մինչդեռ, կարծում է, որ առաջիկա ընտրությունը լավագույն հնարավորությունն էր իր ընդդիմախոսների համար ՝ միասնական թեկնածու առաջադրելու և համոզելու պալատի անդամներին, որ ընդդիմադիր թևի մոտեցումներն ավելի առողջ են:
Իսկ ընդահանուր առմամբ Արա Զոհրաբյանը հակասությունները փաստաբանների միջավայրում նորմալ երևույթ է համարում, համոզված է, որ վայելում է պալատի մոտ 2000 անդամների ճնշող մեծամասնության վստահությունը, իսկ իր ընդդիմախոսները փոքրաթիվ են:
Փաստաբանների պալատի գործող նախագահի ընդդիմախոսներն էլ հակառակում են համոզված ՝ եթե պալատը լուրջ բարեփոխումների չգնա, եթե փաստաբանական ինստիտուտը շարունակի ներկայացված լինել միայն մեկ միավորով ու չլինեն այլընտրանքային ինստիտուտներ, առաջիկայում կարձանագրենք փաստաբանության մահը: Արա Զոհրաբյանը սա որակում է կանխատեսում անեծքների ժանրից:
