Արդյո՞ք նորից օրակարգում է «Ալյուրի հարստացման մասին» նախագիծը: Փորձագետները, վկայակոչելով կառավարության վերջին նիստի օրակարգը, հաստատում են՝ այո, ավելին, ներկայացնում նաև հիմնավորումները: Առողջապահության նախարարությունում, նախ պատասխանեցին՝ ոչ: Հետո հորդորեցին դիմել կառավարությանն ու պարզել՝ ինչո՞ւ է նախագիծը հանվել օրակարգից:
Նախագիծը, ի դեպ, ավելի ուշ հանվել էր օրակարգից: Լրատվամիջոցները, սակայն, նախագծի հիմնավորումը նախապես առաձնացրել էին: « Նախագծում կարևորվում է լրացուցիչ լաբորատոր հետազոտություններ իրականացնելու անհրաժեշտությունը: Ըստ նախագծի` առաջիկա 2 տարիների ընթացքում ՀՀ առողջապահության նախարարությունը նպատակահարմար է գտնում կազմակերպել հանրային և մասնագիտական քննարկումներ` ՀՀ-ում վիտամինա-հանքանյութային անբավարարության հաղթահարման հետագա քայլերի ուղղությամբ փոխհամաձայնեցման հասնելու նպատակով, ինչպես նաև մշակել և ներդնել հանրային իրազեկման ծրագիր` ցորենի ալյուրի պարտադիր հարստացման ուղղությամբ բնակչության իրազեկվածության բարձրացման նպատակով»,- նշված էր նախագծի հիմնավորման մեջ: Առողջապահության նախարարությունից «Ռադիոլուր»-ին հորդորեցին կառավարությանը դիմել: Դիմեցինք: Խոստացան պատասխանել: Սպասեցինք….
Անդրադառնալով Ցորեն ալյուրի հարստացման նախաձեռնությանը՝ սննդագիտության դոկտոր Դավիթ Պիպոյանը վստահեցնում է՝ Հայաստանում առողջապահական խնդրին փորձ է արվում լուծում տալ սննդի միջոցով՝ առանց գիտական հենքի: Նա բնական է համարում հասարակության բացասական կարծիքն այս նախագծի շուրջ: Ավելին,
«Չեն ասում, որ ֆոլատը դեֆիցիտը ինչի արդյունքում է առաջացել Հայաստանում: Ես ասում եմ, որ առաջացել է լեռնահանքային գործունեությամբ:
Սննդագետը հարցադրումներ է առաջ քաշում՝ օրինակ, ալյուրը ֆոլաթթվով հարստացնելու դեպքում ի՞նչ են անելու աղեստամոքսային տրակտով հիվանդները,որոնց հակացուցված է ֆոլատը: Փորձագետը, վկայակոչելով իր հետազոտությունները, նշում է՝ կան մարզեր, որտեղ տասնյակ անգամ գերազանցում են մետաղները, սրան տեղյակ է նաև առողջապահության նախարար Լևոն Ալթունյանը»,- ասում է Պիպոյանը
«Մենք անգամ իր մոտ ենք քննարկել: Եթե դու Հայաստանում ունես մետաղով հարուստ բիոքիմիական պրովինցիա, պատկերացնում եք, ինչ է նշանակում այդ զոնայում ևս մեկ մետաղ ավելացնել: Դա նշանակում է , որ ռիկսը ոչ թե թվաբանական պրոգրեսիայով կաճի, այլ՝ երկրաչափական:
ՀՊՏՀ դեցնետ Վարդուհի Մելիքյանը ևս գիտականորեն վերլուծելով ալյուրի՝ ֆոլաթթվով հարստացնելու նախաձեռնությունը՝ վստահեցնում է՝
«Եթե բոլոր սննդամթերքների մեջ կան այս նյութերը, ամենօրյա սնունդը նյութերի պահանջը ծածկում է: Արդյոք իմաստ ունի՞ ավելացնել նրանց քանակությունը»:
Ըստ կառավարության օրակարգից հանված նախագծի` ՀՀ առողջապահության նախարարությունը նախատեսում է թիրախային խմբերում, մասնավորապես` վերարտադրողական տարիքի կանանց և 0-5 տարեկան երեխաների շրջանում իրականացնել լրացուցիչ լաբորատոր հետազոտություններ` սակավարյունության տարածվածության գնահատման նպատակով: Այսպիսով, հաշվի առնելով վերոնշյալը, ինչպես նաև այն հանգամանքը, որ Եվրասիական տնտեսական միության սննդի անվտանգության և մակնշման կանոնակարգերում ալյուրի պարտադիր հարստացումը որպես պահանջ սահմանված չէ և 2015-2016 թթ-ի. ՀՀ Ժողովրդագրության և առողջության հարցերի հետազոտության արդյունքում սակավարյունության վերաբերյալ ստացված բարելավված ցուցանիշները, ՀՀ առողջապահության նախարարությունը վիտամինա-հանքանյութային թերսնուցման հաղթահարման օրենսդրական դաշտի վերանայմանը կանդրադառնա մի քանի տարի անց` ուսումնասիրության և իրազեկման աշխատանքների արդյունքներն ամփոփելուց հետո:
