Հուլիսի 6-ի երեկոյան ուժեղ քամուց, հորդառատ անձրևներից ու կարկուտից տուժել է Արագածոտնի մարզի մի շարք համայնքների գյուղատնտեսությունը: Արտենի գյուղում մեծ վնաս է հասցվել ծիրանի,խնձորի, սալորի և խաղողի այգիներին, հեղեղվել են բանջար-բոստանային և հացահատիկի ցանքատարածքները,որոնք այժմ լցված են տիղմով ու Արթին լեռան լանջերից փոկված քարերով: Վնասի չափը ճշտում է համայնքային մասնագիտական հանձնաժողովը: Գյուղացիներըմեծ պարտքեր ունեն բանկերին,որոնց մարելու համար այլևս միջոցներ չկան:
Դեռ մեկ շաբաթ առաջ Արագածոտնի մարզի Արտենի գյուղի բնակիչները ակնածանքով էին նայում իրենց այգիներին ու դաշտերին, որտեղից լավ բերք ստանալու մեծ ակնկալիքներ ունեին: Այգիներում հասունանում էր պտուղը, դաշտերում ՝ փարթամանում ձմերուկի,վարունգի և մյուս բանջարեղենի սածիլները: Սակայն բնությունն այնքան էլ բարեհաճ չգտնվեց գյուղացիների նկատմամբ: Հուլիսի 6-ի երեկոյան ուժեղ քամին,անձրևն ու կարկուտը մեծ վնաս պատճառեցին Արտենիի գյուղատնտեսությանը:
Սելավը սրբել տարել էր Մարինե Հարթենյանի ընտանիքի մեկ ամսվա դառը աշխատանքը, որտեղ գիշեր ու զօր քարքարոտ հողի հետ կռիվ տալով մշակում էին ձմերուկ ու վարունգ: 3 հա ձմերուկի, 3000 քմ վարունգի ցանքատարածքից ոչինչ չէր մնացել: Հորդառաատ անձրևները տիղմով էր լցրել մշակովի ցանքատարածքները: Ժորա Գևորգյանը նշեց, որ քամու ուղեկցությամբ հորդառատ անձրևները Արթին կամ Բուղուտ լեռան լանջերից քանդել է հողն ու լցրել դաշտերը. ,, Սելավը Բուղուտ սարից իջավ, փակեց մայրկանալի դեմը,մայրկանալի ջուրն էլ հետըմոտ 6-7 խմ ջուր եկավ բոստանի միջով ավիրելով գնաց, իրիկվա 6-ից մինչև առավոտ ջուրը հըլը էթում էր ,,:
Սելավի հետևանքները դժվար է վերականգնել, զգալի աշխատանք ու միջոցներ են անհրաժեշտ: Վնասվել են նաև հացահատիկի ցանքատարածքները: Գյուղացիները հողերը մշակելու համար օգտվում են գյուղատնտեսական վարկերից: Մարինե Հարթենյանի ընտանիքը 3.5 միլիոն դրամ վարկ է վերցրել 2 բանկից. ,,Աշխատուժը շատ մեծ է, օրական 10-12 բանվոր են աշխատում, դաշտից, որ դուրս ենք գալիսմենքօրական բանվորի փողը տալիս ենք՝6000 դրամ,,:
Հողից լավ բերք ստանալու Տիգրան Գևորգյանի սպասելիքները նույնպես չարդարացան, հուսահատված է, 5 հա սեփականաշնորհված հողատարածքից բացի 1 հա-ը 100 հազար դրամով վարձակալել էր ևս 5 հա վարելահող և դրել ձմերուկի ցանքսի տակ: ,,Իմ սպասումներըլրիվ լցվեց ջուրը: Ձմերուկի դաշտի վրա համարյա 3 միլիոն փողա թափած, ցանքս են արել, քաղհան են արել 10-12 հոգով, մի ամիս, ամեն օր: Էդքան սալյարկա,մեխանիզատորի վարձ, 40 մեշոկ սիլիտրա ենք տվել: Դե, հաշվեք,,:
Շվարած գյուղացիները չգիտեն ինչպես են մարելու պարտքերն ու ինչ ապրուստի միջոց են գտնելու: Արտենիում մշակվում է շուրջ 1800հա հողատարածք, որից 400 հա պտղատու այգիներ են, 200 հա-ը՝ հացահատիկ ,մնացածը՝ վարելահող: Արտենի համայնքի ղեկավար Գեղամ Խլղաթյանը տեղեկացրեց, որ բանկի ներկայացուցիչները լինելու են գյուղում, որպեսզի վարկերի մարման հետ կապված պայմանավորվածություն ձեռք բերեն:
Արտենիում հակակարկտային 8 կայանն անզոր է եղել կարկտաբեր հզոր ամպերի դեմ, խանգարել է նաև քամին: Գյուղացին արդեն սկսելու էր ծիրանի բերքահավաքը, բայց չհացրեց, կիսահաս ծիրանը գրեթե ամբողջությամբ վնասվեց կարկուտից և ուժեղ քամուց թափվեց ծառերի տակ:
Համայնքի ղեկավարը նշեց, որ 280 հա ծիրանի այգիներից քչերը բերք ունեն:
Ծիրանի վնասված բերքի իրացման հետ կապված պայմանավորվածություն է ձեռք բերվել վերամշակող 2 ձեռնարկության՝ Նոյյան բնական հյութերի և Պռոշյանի կոնյակի գործարանների հետ՝ 1 կգ 60 դրամով մթերելու համար:
Բնական աղետից Արտենիում վնասվել են մի քանի առանձնատների տանիքները:
Վնասի չափը ճշտելու նպատակով համայանքային մասնագիտական հանձնաժողովը տուժած գյուղացիների հետ արդեն մի քանի օր դաշտերում արձանագրում են վնասները, որոնք ներկայացվելու են կառավարություն:
