Իրատեսական, հավակնոտ ծրագիր, որտեղ հստակ թիրախներ են դրված. կառավարության դեռ չհաստատված ծրագրի նախագիծն այսպես են բնորոշում ՀՀԿ-ն ու կոալիցիոն գործընկեր ՀՅԴ-ն: Այս ծրագիրը կազմվել է ՝ հաշվի առնելով ՀՀ նախագահ Սերժ Սարգսյանի՝ մայիսի 18-ին վեցերորդ գումարման խորհրդարանի ելույթն ու այստեղ հնչեցրած թեզերը: Ի տարբերություն գործող ծրագրի, կառավարության նոր ծրագրում թվեր կլինեն՝ իշխող քաղաքական ուժը խոստանում է 25 տոկոսով բարձրացնել նվազագույն աշխատավարձը, 12 տոկոսով կրճատել գործազրկությունը, ապահովել 5 տոկոս տնտեսական աճ: Երևանի տնտեսագիտական համալսարանի դոցենտ, տնտեսագետ Ատոմ Մարգարյանը «Ռադիոլուրի» հետ զրույցում հինգ տոկոս տնտեսական աճն իրատեսական է համարել: «Նախորդ կառավարությունն ըստ էության կարճաժամկետ էր, պայմանավորված էր քաղաքական իրողություններով, նախընտրական շրջանի կառավարություն էր»,- ասել է նա:
Ավարտվում է Սահմանադրությամբ նախանշված վերջնաժամկետը, երբ կառավարությունն ԱԺ պետք է ներկայացնի իր գործունեության ծրագիրը: Այն քննարկվելու է խորհրդարանում: Օրերս ֆեյսբուքյան իր էջում վարչապետ Կարապետյանն անդրադարձավ ծրագրի նախագծին, նշեց, որ շատ հստակ ձևակերպում են այն գերակա ոլորտները, ուղղությունները, որոնք համարվում են բիզնեսի, տնտեսության զարգացման համար արդյունավետ և ներուժ ունեցող։ «Մենք հստակ հայտարարելու ենք, որ պետությունն իր մասնաբաժինն է ունենալու և սուբսիդավորելու է գերակա ոլորտների վարկային տոկոսները: Խոսքը վերաբերում է գյուղատնտեսությանը, թեթև արդյունաբերությանը, կաշվի վերամշակմանը, կոշիկի արտադրությանը, գորգագործությանը, ինչպես նաև արտահանմանը»,- ասում է։Վերջին օրերի հայտարարություններից կարելի է փաստել, որ կառավարության գործունեության ծրագրի նախագիծն արդեն պատրաստ է: Որոշ թվային տվյալներ օրինակ ՀՀԿ ԳՄ նիստից հետո ներկայացրեց ԱԺ փոխնախագահ Էդուարդ Շարմազանովը. 25 տոկոս բարձրացնել նվազագույն աշխատավարձը, 12 տոկոսով կրճատել գործազրկությունը, ապահովել 5 տոկոս տնտեսական աճ։
Ֆինանսների նախարար Վարդան Արամյանը խոստովանում է՝ «3.2 տոկոս տնտեսական աճի ցուցանիշը մեր ամբիցիաները չեն, մեր հավակնությունները չեն: Որպեսզի մենք կարողանանք սոցիալական խնդիրները ավելի դյուրին լուծել, մենք պետք է հավակնենք ավելի բարձր տնտեսական աճի: Հավակնությունը դա նշանակում է ջանքեր: Կհաջողվի՞, թե՞ չէ՝ ժամանակը ցույց կտա։ Դրա համար պետք են ջանք թափել ու ավելի բարձր նշաձող դնել»:
Ֆինանսների նախարարը նշում է՝ տնտեսությունում որևիցե ջանք չներդնելու պարագայում էլ ՀՆԱ-ի պոտենցիալ աճը 3-3,6 տոկոս է կազմում: Երևանի տնտեսագիտական համալսարանի դոցենտ, տնտեսագետ Ատոմ Մարգարյանը «Ռադիոլուրի» հետ զրույցում նշում է՝ միանգամայն ընդունելի է տնտեսական աճի հինգ տոկոսի թիրախը: Փորձագետը, սակայն, չի կարծում որ ոչինչ չանելով հնարավոր է 2-2,5 տոկոս աճ ապահովել: «Դեռ պետք է կատարել այս տարվա համար նախանշված 2,3 տոկոս աճը»,- ասում է ու հիշեցնում 2016-ի գրեթե զրոյական աճը: Երկարաժամկետ հատվածում կարևորում է կառուցվածքային բարեփոխումները , որոնք ներկայացված են լինելու կառավարութան ծրագրում:
Մոտ 30 տոկոս աղքատությունը, ըստ ՀՀ նախագահի՝ մայիսի 18-ին հնչեցրած ելույթի, 2040 թ. առնվազն պետք է կիսով չափ նվազի։ Այստեղ կարևոր է ոչ միայն բացարձակ թիվն է, այլ նաև եկամուտների բաշխման հարցը՝ ասում է տնտեսագետ Ատոմ Մարգարյանը
