Լուսինե Ավանեսյան
«Ռադիոլուր»
Արցախում տարին փակելու են փոփոխված պետական բյուջեով: Պատճառներից մեկը ապրիլյան իրադարձություններն են: Կառավարության առաջարկին արդեն հավանություն են տվել նաեւ Ազգային ժողովում: 2016 թվականի պետական բյուջեի մասին օրենքի փոփոխությամբ բյուջեի պակասուրդը կավելանա մոտ 4 միլիարդ դրամով:
Արցախի պետական բյուջեի պակասուրդի ավելացման պատճառը պլանավորված եկամուտների կրճատումն: Դրա վրա ազդել են ապրիլյան իրադարձությունները, որոնց հետեւանքները պետական բյուջեի եկամտային մասի վրա ավելի քան մեկ միլիարդ դրամի ազդեցություն են թողել:
Բացի դրանից ապրիլից հետո բավականին բարդ իրավիճակում հայտնված փոքր ու միջին ձեռնարկություններին եւ ուղեւորափոխադրողներին աջակցելու նպատակով օրենսդրական փոփոխություններ էին կատարվել` 2016 թվականի համար հարկային արտոնություններ սահմանելով: Դրանց արդյունքում պետական բյուջե չի մուտքագրվի մոտ 300 մլն դրամ:
Սպասվածից մոտ 1միլիարդ 600 միլիոն դրաով քիչ գումար պետական բյուջե կփոխանցի Արցախի խոշոր հարկատուներից Բեյզ Մեթլըզ ընկերությունը:
Մոտ երկու միլիարդ դրամ կրճատվելու է նախատեսված ծախսերում. կառավարությունում ասում են, որ դրանից սոցիալական ծրագրերը չեն տուժելու` կրճատումները տարվա ընթացքում կատարված խնայողությունների հաշվին են:
Տնտեսված գումարները ուղղվելու են Քաշաթաղի եւ Շահումյանի շրջաններում, ինչպես նաեւ ապրիլյան իրադարձություններից տուժած Մարտակերտ քաղաքում եւ Մատաղիս գյուղում բնակարանաշինական ծրագրերին` ձեռք են բերվելու շինանյութեր:
Գումարների մի մասն ուղղվելու է ճանապարհաշինական ծրագրերին։ Խոսքը հատկապես առաջնադիրք տանող ճանապարհների եւ ինժեներական կառույցների մասին է: Հենց այս մեկնաբանությունն էլ Արցախի խորհրդարանական ընդդիմության համար կանխորոշիչ էր` կառավարության բյուջեի դեֆիցիտն ավելացնելուն կողմ քվեարկելու հարցում:
Արցախում արդեն սկսված է գալիք տարվա բյուջետային գործընթացը: Առաջիկա եռամյա միջնաժամկետ ծախսային ծրագրերով 2017 թվականի բյուջեն իր հնարավորություններով այս տարվա բյուջեից չի տարբերվելու: Համենայնդեպս` անկախ գնաճից աշխատավարձերի թոշակների եւ այլ սոցիալական վճարումների աճ չի նախատեսվում:
