Հայկական հոգեւոր երաժշտությունը Շվեյցարիայում ներկայացրել են փոքրիկ երգիչները

«Հայաստանի փոքրիկ երգիչներ»- ի հերթական շրջագայությունը: Երգչախումբն օրերս է  վերադարձել Շվեյցարիայում կայացած  25-օրյա համերգային շրջագայությունից։ Այն նվիրված էր Հայաստանի անկախության 25-ամյակին: Շրջագայությունից ստացած  տպավորությունների և առաջիկա անելիքների մասին այսօր նրանք խոսել են լրագրողների հետ։

 

Հարուստ կենսագրություն ունեցող  «Հայաստանի փոքրիկ երգիչներ» երգչախումբն արդեն  երրորդ անգամ հայկական հարուստ մշակույթը ներկայացնում է  շվեյցարացի ունկնդրին:  16 համերգներով երկրի ֆրանսիական, իտալական և գերմանական հատվածների եկեղեցիներում, տաճարներում ու համերգասրահներում հնչել է հայ հոգևոր, ժողովրդական, ժամանակակից ստեղծագործություններ ու արտասահմանյան հեղինակների դասական երգեր:

Երգչախումբը  բարձր ընդունելության է արժանացել  ունկնդրի կողմից:  Շարականներ երգելուց առաջ երգչախումբը նախ փոքրիկ պատմական ակնարկ է անում երգի վերաբերյալ: Ըստ երգչախմբի գեղարվեստական ղեկավար Տիգրան  Հեքեքյանի՝ սովորաբար կատարում են  5-րդ դարի շարականները, ինչը զարմացնում է  օտարերկրացի ունկնդրին: «Երբ մենք ասում ենք, որ սա 5-րդ դար է՝ մտածելու տեղիք է տալիս: Եթե այս ժողովուրդն ունեցել է  նման տիեզերական երաժշտություն, ինչպես նա կարող է լինել բարբարոս, ինչպես մեզ շատ այլազգի լրատվամիջոցներ ներկայացնում են արտերկրում»:

Համերգային ծրագրից բացի երեխաները շրջել են  Շվեյցարիայի տեսարժան վայրերով,  այցելել շվեցարական հանրահայտ շոկոլադի և պանրի գործարաններ, տեղում  ծանոթացել պատրաստման եղանակին ու  համտեսել:

Երգչախմբի Ֆրիբուրգի սբ. Միշել եկեղեցում ունեցած ելույթը հեռարձակվել է  շվեյցարական հայտնի Espace ռադիոկայանով: Համերգներից հետո  բազում հիացական խոսքեր են հնչել  երգչախմբի բարձր կատարողականության մասին:. «Ես միշտ ասել եմ իմ ղեկավարած երգչախմբերին, որ երաժշտության մեջ ամենից  կարևորը լավագույնին ձգտելն է, քանի որ կատարյալին հասնելը անհնար է… սակայն Հայաստանի փոքրիկ երգիչներին լսելուց հետո հասկացա, որ սխալվել եմ»,- ասել է կոմպոզիտոր Անդրե Դյուկղեն։

Սեպտեմբերին երգչախումբը պատրաստվում է  հաջորդ շրջագայությանը՝ Դանիա, Նիդեռլանդներ,  Գերմանիա, որը նույնպես նվիրված է Անկախության 25-ամյակին: Սակայն մինչ շրջագայությունը՝ երգչախումբը հունիսի  21-ին  պատրաստվում  է  «5 երանգ» խորագրով համերգին, որն  նվիրված է կոմպոզիտորներ  Էդուրադ Միրզոյանի, Առնո Բաբաջանյանի, Ղազարոս Սարյանի, Ալեքսանդր Հարությունյանի և Ադամ Խուդոյանի հոբելյաններին: