«Միանշանակ է, որ մեր ռազմաարդյունաբերական համալիրում պետք է լուրջ ներդրումներ ու լուրջ առաջընթաց ունենանք, առանց որի հնարավոր չէ ունենալ բարձր պաշտպանունակություն»,- այսօր Մերիդիան ազատ տնտեսական գոտում շրջայցից հետո լրագրողների հետ զրույցում հայտարարել է էկոնոմիկայի նախարար Արծվիկ Մինասյանն ու հավելել, որ սա այն հատման կետն է, որտեղ տնտեսությունն ու անվտանգությունը միացյալ համակարգ են ապահովում՝ ձևավորելով պաշտպանունակության հզորացումը:
Էկոնոմիկայի նախարարի խոսքով, դա վերաբերում է արդյունաբերության հիմնական ուղղություններին՝ սկսած սարքաշինությունից, բարձր տեխնոլոգիաներից ավարտված ռազմական արդյունաբերության մեջ ամբողջ ճարտարագիտական ներուժը ներդնելով:
Արծվիկ Մինասյանը փակագծեր չի բացել, սակայն, նշել է, որ առաջիկայում ականատես ենք լինելու ռազմաարդյունաբերական ոլորտի մի քանի լուրջ նախաձեռնությունների: Անդրադառնալով Հայաստանի՝ Եվրասիական Տնտեսական Միության կազմում մնալ-չմնալու հարցին, էկոնոմիկայի նախարար Արծվիկ Մինասյանն ասել է.
«Ես որպես էկոնոմիկայի նախարար դիտարկում եմ ցանկացած համագործակցություն, որը կբերի տնտեսության զարգացմանը՝ առանց որևէ վերապահման: ԵԱՏՄ շրջանակներում մենք պետք է մեր առավելագույն հնարավորությունները գործադրենք՝ չսպասելով, թե պետք է որևէ երկիր այդ թվում՝ ԵԱՏՄ շրջանակներում, բլիթներ է բաժանելու՝ ոչ: Եթե մենք ուզում ենք առաջ գնալ, զարգանալ, նույն ակտիվ նախաձեռնողական առանձին դեպքերում անգամ ագրեսիվ տնտեսական քաղաքականությունը մենք պետք է վարենք այս միության շրջանակներում: Միայն այդ դեպքում մենք կկարողանանք ասել, որ ԵԱՏՄ-ից մենք ստացանք ավելին,քան սպասում էինք»:
