Երեկ Արմավիրից Արցախ ուղևորվեց կամավորականների մի մեծ բանակ, որոնք արդեն դիրքերում են և մասնակցում են պաշտպանական մարտերին: Երկրապահ կամավորների միության Արմավիրի մարզային կառույցում այսօր առավոտվանից չի դադարում մարդկանց հոսքը, որոնք շտապում են հերթագրվել և ժամ առաջ մեկնել ճակատ: Այնտեղ էր նաև ԱԺ պատգամավոր, Սև Հովազ ջոկատի հրամանատար Ռուստամ Գասպարյանը, ով սպասում էր համապատասխան հրահանգի:
«Աշոտ ջան ոնց եք… տղաների հոգեբանությունը ոնց ա… լրիվ պատրաստ եք….տղերքին բարևիր, դուխները բարձր, ստեղ ամեն ինչ լավ ա»,- Հովսեփ Հակոբյանը հեռախոսով հարցուփորձ է անում արդեն մարտական դիրքերում գտնվող ԵԿՄ Արմավիրի մարզային խորհրդի նախագահ Աշոտ Խաչատրյանին: Այստեղ ամեն ինչ լավ է արտահայտությունը Հովսեփը նկատի ուներ, որ տղաները կամավոր ներկայանում ու հերթագրվում են մեկնելու Արցախ, ռազմական դիրքեր, որտեղ թեժ մարտեր են ընթանում: Պատմությունը կրկնվում է և արցախյան ազատամարտին մասնակցած կամավորները կամ նախկին ֆիդայիններն այսօր էլ մեծ ոգևորությամբ շտապում են իրենց անունները ներառելու կամավորականների ցուցակում և հնարավորինս շուտ տեղ հասնելու: Հայրենիքը վտանգի մեջ է և ազգը նորից բռունցք է դարձել, միավորվել մարտնչելու ոսոխի դեմ:
Աժ պատգանավոր Ռուստամ Գասպարյանը Արցախյան ազատամարտի առաջին իսկ օրերից սկսած մարտի դաշտում է եղել և կազմավորել էր «Սև հովազ» ջոկատը: Արդեն 25 տարի արմավիրցի երկրապահները պահում են Հայաստանի հյուսիս-արևելյան սահմանի մի հատվածը: Ռուստամ Գասպարյանն այսօր հավաքագրում է իր ջոկատի մարտիկներին:
Պայմանագրային զինծառայողները փորձ ունեն և այսօր էլ իրենց հրամանատարի կողքին են:
Արցախյան ճակատ մեկնել ցանկացողների հոսքը դեռ շարունակվում է, նրանց մարտական ոգին ու տրամադրությունը բարձր է:
