Շփման գծում լարված իրավիճակի պայմաններում Հայաստանից ու Արցախից բազմաթիվ կամավորներ ու ազատամարտիկներ առաջնագիծ մեկնելու պատրաստականություն են հայտնել: Գնում ենք մեր երիտասարդների մարտական ոգին էլ ավելի բարձրացնելու ու նրանց կողքին լինելու համար, ասել են նրանք:
Ղարաբաղա-ադրբեջանական սահմանին ընթացող լարված իրավիճակի պայմաններում Հայաստանից ու Արցախից ազատամարտիկների ու կամավորների հավաքագրված խմբեր են բարձրանում առաջնագիծ՝ սահմանին կանգնած զինվորի կողքին լինելու նպատակով: Երեկ երեկոյան Ստեփանակերտի կենտրոնում՝ զինվորական հավաքակայանի մոտ, շուրջ 1000 մարդ է հավաքվել: Այսօր էլ ազատամարտիկներն ու կամավորները Արցախի ազատամարտիկների միությունում մարտական հենակետեր մեկնելու պատրաստակամություն են հայտնել:
«Մի մասը հենա ընդեղ, մի մասը ստեղ, մի հարյուրավոր հազարավոր մարդիկ կան, որ եկալ են խնդրում են, որ ընկերներն այնտեղ են մենք էլ ենք ուզում գնալ: Շատ լավ են դուխով, մեր երիտասարդության մեջին կա, մեր ազգին մեջին կա: Ցավը տանեմ մեր ժողովուրդին, մեր ազգին, մեր տղորանցը մեկ մարդու նման կանգնած են մինչև վերջ»:
Ըստ Ղարաբաղի ազատամարտիկների միության աշխատակազմի ղեկավար Էդուարդ Խաչատրյանի՝ պաշտպանական բանակն իր առջև դրված խնդիրը կատարում է գերազանց, իսկ հազարավոր կամավորներ արդեն պաշտպանում են մարտական դիրքերը:
«Մենք էլ սպասում ենք հրահանգ լինելու դեպքում բարձրանալ դիրքեր: Մեր մատաղ սերնդին մենք մենակ չենք թողնի»:
ԵԿՄ վարչության նախագահ, գեներալ Մանվել Գրիգորյանի հրահանգով՝ 20 տարեկանից բարձր բոլոր երկրապահ կամավորականները նույնպես հավաքվել են մարզային վարչություններում: ԵԿՄ մամուլի բաժնի ղեկավար Վարդան Վարդանյանը «Ռադիոլուրի» հետ զրույցում նշեց, որ Երկրապահ կամավորական միության կենտրոնական երևանյան վարչության գրասենյակը մարդաշատ է: Այստեղից հազարավոր կամավորներ սեփական դիմումի համաձայն ցուցակագրվել և այս պահին մեկնում են առաջնագիծ: Ըստ մամուլի պատասխանատուի՝ քայլերն էլ համաձայնեցվում են պետական կառույցների հետ:
Կամավոր ջոկատներ են հավաքագրվել նաև Հայաստանի տարբեր մարզերից: Ապարանի երկրապահները նույնպես մեկնել են առաջնագիծ, իսկ Արագածոտնի մարզի ազատամարտիկների միությունից ևս 10-ը ազատամարտիկ մեկնելու պատրաստակամություն է հայտնել: Խմբի ղեկավար Մնաց Հակոբյանի խոսքով՝ սահմանին կանգնած երիտասարդներին երբեք միայնակ չեն թողնի:
Ղարաբաղյան պատերազմի վետերաններն էլ իրենց հերթին են պատրաստ աջակցել սահմանին կանգնած զինվորին: Առավոտվանից հավաքվել են Նուբարաշենի զորամասում և պատրաստվում են մեկնել Արցախ: Ղարաբաղյան պատերազմի վետերանների միության նախագահ Յուրի Միքայելյանն էլ իր հերթին մեզ փոխանցեց, որ անհրաժեշտ զենք ու զինամթերքը ստանալուց հետո կշարժվեն առաջնագիծ: Մոտ 200 հոգի վետերան պատրաստ է մեկնելու, ասում է:
Ազատամրտիկները նշում են, որ բարձր տրամադրությամբ ու մարտական ոգով են մեկնում առաջնագիծ՝ սահմանում մարտնչող զինվորների անպարտելի ոգին էլ ավելի բարձրացնելու համար:
