Վրաստանում «զիկա» վիրուսի տարածման վտանգ մասնագետները չեն տեսնում: Այս մասին «Ռադիոլուր» -ին հայտնել են Վրաստանի հիվանդությունների վերահսկաման և կանխագելման ազգային կենտրոնից: Չնայած նրան, որ տենդը փոխանցող մոծակները երկրում հայտնաբերվել են, այդուհանդերձ այս տենդի տարածման վտանգը նվազագույն է:
Վրաստանում պատրաստվում են մոծակների դեմ հերթական միջոցառումն իրականացնել երկրի հատկապես այն շրջանններում, որտեղ հնարավոր է, որ այս տարի ամռանը եվս հայտնվեն «զիկա» վիրուսը տարածող մոծակները:
«Aedes aegypti» տեսակի մոծակները, որոնք համարվում են աշխարհում այսօր ահագնացող «զիկա» վիրուսի փոխանցողները, Վրաստանում հայտնաբերվել են երկու անգամ: Ինչպես «Ռադիոլուրի» հետ զրույցում նշեց Վրաստանի հիվանդությունների վերահսկաման և կանխագելման ազգային կենտրոնի պետի տեղակալ Պաատա Իմնաձեն, վերջին 60 տարիների ընթացքում այդ մոծակը երկու տարի առաջ հանդիպել է Բաթումիի նավահանգստի, իսկ անցյալ տարի` Զուգդիդիի մոտակայքում` անիվների պահեստամասում:
«Այն որ այդ մոծակը հայտնաբերվել է Վրաստանում, դա չի նշանկում, որ վիրուսի տարածման վտանգ կա: Օրինակ մալարիան տարածող մոծակներ կան և Հայաստանում, և Վրաստանում, բայց մեր երկրներում մալարիա չկա»:
Ասաց Իմնաձեն, նշելով, եթե երկրում չկա տենդով վարակված մարդ, ապա մոծակները չեն կարող տարածել հիվանդությունը: Բացի այդ, Վրաստանի քաղաքացիները Լատինական Ամերիկայի երկրներ գրեթե չեն այցելում:
«Զիկա» վիրուսն առաջին անգամ հայտնաբերվել է 1947 թվականին Ուգանդայում: Սկզբնական շրջանում նշվում էր, որ այն մարդու առողջությանը չնչին վնաս է հասցնում: Սակայն տարիների ընթացքում վիրուսը տարածվել է, փոփոխության ենթարկվել ու վտանգավոր դարձել հատկապես հղիների համար. ազդում է պտղի վրա:
Այսօր աշխարհի մի շարք երկրներում` մասնավորապես Բրազիլիայում, անցյալ տարվանից ահագնացող «զիկա» տենդով վարակվել է ավելի քան կես միլիոն մարդ:
Այս հիվանդության դեմ պայքարող պատվաստանյութ կամ դեղամիջոց չկա:
Վրաստանում վարակի տարածման վտանգը նվազագույն է: «Ռադիոլուրի» հետ զրույցում եվս մեկ անգամ վստահեցրեց Իմնաձեն, նշելով, որ «Aedes aegypti» ցեղի մոծակները տարածված չեն Վրաստանում:
«Մենք անցյալ տարի սև ծովի ափերին մոծակների դեմ զանգվածային գործողություններ ենք իրականացրել: Այս տարի եվս աշխատում ենք այդ ուղղությամբ, որպեսզի տենդը փոխանցող մոծակների համար ոչ մի պայման չլինի այստեղ»,-ասաց Իմնաձեն, նշելով, որ այսօր վարակից խուսափելու մյուս ձևն էլ` ուղղակի չայցելել այն երկրերն, որտեղ առկա է «զիկա» վիրուսը:
Վրաստանի հիվանդությունների վերահսկաման և կանխագելման ազգային կենտրոնի ներկայացուցիչը նաև ավելացրեց, որ մտահոգիչ է, որ «զիկա» վիրուսը տարածող մոծակներն ավելի մեծ քանակությամբ հայտանաբերվել են Աբխազիայում, Կրասնոդարի և Ստավրոպոլի երկրամասերում:
Բացի այդ, Ռուսաստան գրանցվել է վիրուսով վարակման առաջին դեպքը. Դոմինիկյան հանարապետություն հանգստանելու մեկնած Ռուսատանի մի քաղաքացի վերադարձել է հիշյալ վիրուսով վարակված:
