Նախագահ Սերժ Սարգսյանը երեկ Օպերայի եւ բալետի պետական ակադեմիական թատրոնում ներկա է գտնվել Հայաստանի երիտասարդական հիմնադրամի կազմակերպած «Հայկյան» մրցանակաբաշխությանը: Ամենամյա դարձած «Հայկյան» մրցանակաբաշխության նպատակը որոշակի հաջողությունների հասած երիտասարդական կազմակերպություններին, երիտասարդ քաղաքացիներին խրախուսելն է:
«15 տարիների ընթացքում մենք տեսանք, թե երիտասարդական դաշտը ինչպիսի զարգացում ապրեց: Շատ խնդիրներ, որոնք դրված էին այն ժամանակվա երիտասարդների առջեւ, այսօր իրենց լուծումները գտել են: Շատ երիտասարդներ, ովքեր արժանանում են «Հայկյան» մրցանակին, դրանք այն երիտասարդական կազմակերպություններն են, ուսանողական կազմակերպությունները, անհատները, ովքեր կարողանում են իրենց աշխատանքով առանձնանալ: Մենք ուզում ենք, որ այդ աշխատանքը բարձրաձայնվի, այդ աշխատանքի մասին իմանան բոլորը, քանի որ այդ մարդիկ միայն իրենց համար չեն աշխատում»:
Կարեն Ավագյանի փոխանցմամբ՝ բավականին ակտիվ են երիտասարդական, ուսանողական կազմակերպությունները: Սակայն, նրա գնահատմամբ, մարզային հասարակական կազմակերպությունների առումով ինչ-որ չափով պասիվություն կա՝ տարբեր պատճառներով: Հիմնադրամը ուշադրություն է դարձնում նաեւ նրանց ակտիվացնելու խնդրին:
«Մեզ դիմում են միայն այն կազմակերպությունները, որոնց իրականացրած ծրագրերը արժանի են մրցանակի: Այն կազմակերպությունները, որոնք ուղղակի իրենց գործն են արել, կներեք, դա իրենց գործն է եւ դրա համար մրցանակ չեն ստանում: Մրցանակ ստանում են այն կազմակերպությունները, որոնք իրենց գործից ավել գործ են արել»:
8 անվանակարգերում ու 9 հատուկ մրցանակների հաղթող ճանաչվածները բոլորն էլ լավն են: Որեւէ մեկին առանձնացնելը Կարեն Ավագյանը գեղեցիկ չհամարեց: Ընդգծեց, սակայն, «Հայրենիքի դարպասներ» կազմակերպության անունը, որը աշխատանքներ է իրականացնում սահմանամերձ համայնքներում: Կազմակերպության հիմնադիր նախագահ Արման Հայրապետյանն ասաց, թե իրական խնդիրները կարելի է հասկանալ՝ մեկ անգամ լինելով սահմանամերձ բնակավայրում:
Մրցանակաբաշխության կազմակերպիչները խոստովանում են, որ կան շատ կազմակերպություններ, որոնք հայտնի են անունով, սակայն, նրանց կատարած աշխատանքները քիչ են: Մինչդեռ, կա նաեւ հակառակ իրավիճակը՝ մեծ գործ անող, բայց ոչ այդքան հայտնի: Հենց նրանց հայտնի դարձնելու խնդիր է նաեւ լուծում ամենամյա «Հայկյան» մրցանակաբաշխությունը: Այս մրցանակաբաշխության շրջանակներում խրախուսվում են նաեւ սովորողների ձեռքբերումները, ովքեր տարվա ընթացքում առանձնացել են իրենց ակտիվությամբ և տարբեր ոլորտներում իրականացրած ծրագրերի բովանդակությամբ։ Էդգար Վարդանյանը ամենաերիտասարդ մրցանակակիրն էր: Ֆիզմաթ դպրոցի աշակերտը 8 մեդալ է բերել միջազգային օլիմպիադաներից, երեքը՝ ոսկե:
Ավանդական անվանակարգերից բացի, սահմանվել էին նաև հատուկ մրցանակներ, որոնք մրցանակակիրներին հանձնեց ՀՀ նախագահ Սերժ Սարգսյանը:
Շնորհավորելով բոլոր մրցանակակիրներին՝ նախագահ Սերժ Սարգսյանը ողջունեց Հայաստանի երիտասարդական հիմնադրամի նախաձեռնությունը եւ հետագա նորանոր հաջողություններ մաղթեց:
Հատուկ մրցանակ շնորհվեց նաեւ հանրային ռադիոյի մեր ավագ գործընկեր Գոհար Մարտիկյանին՝ «Ապրելու բանաձեւ» ռազմահայրենասիրական մատենաշար-ծրագրի համար:
