Հանրապետությունում ավարտին է մոտենում կարտոֆիլի բերքահավաքն ու խաղողի մթերումը: Գյուղատնտեսության փոխնախարար Գառնիկ Պետրոսյանը «Ռադիոլուր»-ի հետ զրույցում նշել է, որ եղանակային անկայունությամբ պայմանավորված, հիմնականում Շիրակի ու Գեղարքունիքի մարզերում քիչ քանակությամբ, սակայն, կարտոֆիլ է մնացել հողի տակ: Տեղումների դադարից հետո աշխատանքները կավարտվեն: Փոխնախարարը խաղողի մթերմանն ու դրա հետ կապված խնդիրներին էլ է անդրադարձել՝ վստահեցրել, որ պայմանագրերում նշված ժամկետներից գումարների վճարումը չպետք է ուշանա: Թե որքան է խաղողի մթերման դիմաց գյուղացիներին կուտակած պարտքը, դեռ հաշվարկվում է: ԿԲ-ի հետ քննարկումներ են սկսվել ու չի բացառվում, որ վարկային պարտավորություններ ունեցող խաղող մթերած և գումար դեռ չստացած գյուղացիներին, տարբերակված մոտեցում ցուցաբերվի: Թե ինչպիսի՞ դեռ փակագծերը չեն բացվում: Պաշտոնյան նաև տեղեկացրել է, որ ազատ միջոցների պակաս ունեցող տնտեսվարողներից մի քանիսին կառավարությունը հնարավորություն է տվել օգտվել սուբսիդավորված վարկերից: Մի քանի վերամշակող ընկերություն 9,5 տոկոսով երկարաժամկետ վարկեր են ստացել՝ իհարկե գրավադրված գույքի պարտադիր պայմանով:
Ագրագյուղացիական միավորման նախագահ Հրաչ Բերբերյանն այսօր իր մտահոգություններն է փոխանցել: Կարտոֆիլի բերքահավաքի ու խաղողի մթերման հետ կապված խնդիրները՝ «Ռադիոլուր»-ի թեմատիկ անդրադարձում:
