ԱՄՆ-ում 100 տարեկանում մահացել է ԱՄՆ 39-րդ նախագահ, Խաղաղության Նոբելյան մրցանակի դափնեկիր Ջիմի Քարթերը։ Նախկին նախագահը ծանր հիվանդ էր:
«Կոչ եմ անում ամերիկացի ժողովրդին հարգանքի տուրք մատուցել նախագահ Ջեյմս Էրլ Քարթերի հիշատակին»,- ասել է ԱՄՆ գործող նախագահ Ջո Բայդենը։ Իր ցավակցություններն է հայտնել նաև ԱՄՆ ընտրված առաջնորդ Դոնալդ Թրամփը։
Ջիմի Քարտերն ԱՄՆ 39-րդ նախագահն է, նա պաշտոնը զբաղեցրել է 1977 թվականի հունվար 20-ից մինչև 1981 թվականի հունվար 20-ը։
2002 թվականին նա ստացել է Խաղաղության Նոբելյան մրցանակ «աշխարհում հակամարտությունները խաղաղ ճանապարհով լուծելու և մարդու իրավունքների համար պայքարելու ջանքերի համար»։
Դեմոկրատ Քարթերը նախագահ դարձավ 1977 թվականի հունվարին՝ 1976 թվականի ընտրություններում հաղթելով գործող հանրապետական նախագահ Ջերալդ Ֆորդին։ Նրա մեկանգամյա նախագահությունը նշանավորվեց 1978 թվականին Իսրայելի և Եգիպտոսի միջև Քեմփ Դեյվիդի համաձայնագրերով, որոնք որոշակի կայունություն բերեցին Մերձավոր Արևելքում:
Դրանից հետո տնտեսական անկումը, ինչպես նաեւ Իրանում իսլամական հեղափոխության ժամանակ Թեհրանում ԱՄՆ դեսպանատան գրավումը եւ պատանդների ճգնաժամ ազդեցին նրա վարկանիշի վրա։
Քարթերը հաղթեց 1980 թվականի ընտրություններում, սակայն ընտրիչներն իրենց ձայնը տվեցին նրա հանրապետական մրցակցին՝ նախկին դերասան և Կալիֆորնիայի նահանգապետ Ռոնալդ Ռեյգանին:
ԱՄՆ նախագահներից ամենից երկար ապրած Քարթերը Սպիտակ տնից հեռանալուց հետո ձեռք էր բերել հումանիստի համբավ: Նրան շատերը համարում են ԱՄՆ լավագույն նախագահ։
Ջեյմս Էրլ Քարթերը պատմության մեջ առաջին բարձրաստիճան պետական գործիչն է, որը խնդրել է իրեն կոչել կրճատ՝ Ջիմի անունով։ «Ես պարզ ֆերմեր եմ, սա ինձ ավելի ծանոթ է»,- բացատրել է նա լրագրողներին:
Միջին ամերիկացի ընտրողին ոչինչ դուր չի գալիս հավաքական Վաշինգտոնում: Քարթերը լիովին օգտագործեց իդեալիստ գավառացու կերպարը, որը չգիտի և չի ցանկանում իմանալ մետրոպոլիայի բարքերը և իրական քաղաքականությունը, գրում է Reuters-ը:
Նրա քարոզարշավի հիմնական կարգախոսն էր. «Ես քեզ երբեք չեմ ստի»:
Իրականում, նա ամենևին էլ պարզունակ մարդ չէր. ուներ երկու հեղինակավոր դիպլոմ՝ Ջորջիայի տեխնոլոգիական ինստիտուտի և Անապոլիսի ռազմածովային ակադեմիայի, 1950-ականների սկզբին ծառայել էր առաջին միջուկային սուզանավերում և զբաղվել հողագործությամբ՝ ժառանգելով ընտանեկան բիզնեսը։
