Այսօր լրանում է Ռուսաստանի Դաշնության և Հայաստանի Հանրապետության միջև բարեկամության, համագործակցության և փոխօգնության պայմանագրի ստորագրման 25-ամյակը: Այդ կապակցությամբ ՌԴ ԱԳՆ-ը հայտարարություն է տարածել։
«Ռուսաստանի Դաշնության և Հայաստանի Հանրապետության միջև բարեկամության, համագործակցության և փոխօգնության պայմանագրի ստորագրումը, մեծապես որոշել է մեր միջպետական հարաբերությունների սկզբունքներն ու առաջնահերթությունները։ Փաստաթուղթը կարևոր հանգրվան է դարձել երկկողմ գործընկերությունը իսկական դաշինքի մակարդակի հասցնելու ճանապարհին։
Անցած ժամանակաշրջանը համոզիչ կերպով ցույց է տվել, որ Մոսկվայի և Երևանի միջև պատմական կապերի հետագա ամրապնդումը լիովին համապատասխանում է մեր ժողովուրդների կենսական շահերին, ծառայում է երկու երկրների սոցիալ-տնտեսական զարգացման և Հարավային Կովկասում կայունության ամրապնդմանը։ Մենք հաջողությամբ առաջ ենք շարժվում համագործակցության լայն շրջանակում՝ այն լրացնելով կոնկրետ բովանդակությամբ և բարձրացնելով փոխգործակցության արդյունավետությունը։
Երկկողմ ներուժի ձևավորման համար վճռորոշ նշանակություն ունեն Ռուսաստանի և Հայաստանի ղեկավարությունների միջև վստահության վրա հիմնված կանոնավոր շփումները, որոնք հնարավորություն են տալիս ոչ միայն լուծել հրատապ խնդիրները, այլև համակարգել դիրքորոշումները տարածաշրջանային և միջազգային հիմնական խնդիրների վերաբերյալ:
2022 թվականի ապրիլի 19-20-ը ՀՀ կառավարության ղեկավարի Ռուսաստան կատարած պաշտոնական այցի ընթացքում ընդունված Ռուսաստանի Դաշնության Նախագահ Վ.Վ.Պուտինի և Հայաստանի Հանրապետության վարչապետ Ն.Վ.Փաշինյանի համատեղ հայտարարությունը հաստատում է մտադրությունը. համակողմանիորեն խորացնել և ընդլայնել միջպետական հարաբերությունները 1997 թվականի պայմանագրով ամրագրված սկզբունքների համար։
Մենք վճռական ենք շարունակել առանցքային դաշնակցի դիրքերից օգնել Երևանին իր պաշտպանունակության և սահմանային անվտանգության ամրապնդման և հարևանների հետ հարաբերությունների կարգավորման գործում։
Համոզված ենք, որ տարածաշրջանում կայունության ուղին անցնում է 2020 թվականի նոյեմբերի 9-ի, հունվարի 11-ի և 2021 թվականի նոյեմբերի 26-ի եռակողմ համաձայնագրերի խստիվ պահպանմամբ: Ռուսական խաղաղապահ զորախումբը մնում է Լեռնային Ղարաբաղում անվտանգության ապահովման հիմնական գործոնը:
Մենք անկեղծորեն գնահատում ենք մեր բարեկամությունը եղբայրական Հայաստանի հետ և վճռական ենք ավելի ամրապնդելու ռուս-հայկական դաշնակցային հարաբերությունները՝ հանուն մեր երկրների և ժողովուրդների բարգավաճման»,-ասված է ՌԴ ԱԳՆ տարածած հայտարարության մեջ։