Թբիլիսին այս օրերին դարձել է համաշխարհային ֆուտբոլի մայրաքաղաքը: Վրաստանի մայրաքաղաք են ժամանել համաշխարհային ֆուտբոլի այնպիսի աստղեր, ինչպիսիք են Մեսսին, Ինեստան, Սուարեսը, Պիկեն… Դեռևս 2 տարի առաջ, երբ հայտնի դարձավ , որ Վրաստանի մայրաքաղաքն է ընդունելու Եվրոպայի սուպերգավաթը, մեր տարածաշրջանում արդեն իսկ ֆուտբոլային աշախուժություն սկսվեց, իսկ «Բարսելոնայի» մասնակցությունը սուպերգավաթի խաղին ՈՒԵՖԱ-ի սուպերգավաթը դարձրեց չափազանց սպասված:
Վերջին տարիներին մեր տարածաշրջանում «Բարսելոնայի» մակարդակի ակումբ չի եղել: Իհարկե՝ եթե «Սևիլիայի» փոխարեն «Բարսելոնայի» մրցակիցը լիներ մեկ այլ հանրահայտ թիմ, ինչպիսին «Մանչեստր Յունայթեդը», «Բորուսիան» կամ «Չելսին» են, ապա սուպերգավաթի կարևորությունը ավելի մեծ կլիներ:
Ինչևէ, այսքանն էլ բավարար է որ Վրաստանն ապրի ֆուտբոլային շնչով: Խաղի տոմսերի վաճառքն անգամ հսկայական իրարանցում էր առաջացրել Թբիլիսիում: Մարդիկ օրերով ու ժամերով հերթ էին կանգնում, որպեսզի կարողանան ձեռք բերել երկար սպասված խաղի տոմսեր: Առավելագույնը 30 եվրո արժողության տոմսերը այսօր արդեն սև շուկայում գերազանցում են 300 եվրոն:
Հարկ է նշել , որ Թբիլիսին ամենայն լրջությամբ է նախապատրաստվել այս կարևոր իրադարձությանը: Խաղը լուսաբանելու համար Վրաստան են ժամանել 1000- ից ավելի լրագրողոներ, իսկ զբոսաշրջիկների թիվը անցնում է 30 հազարը: Թերևս պետք է նախանձով նշեմ, որ վրացիները հիանալի պայմաններ են ստեղծել թե զբոսաշրջիկների, թե ֆուտբոլիստների, թե լրագրողների համար: Սա զբոսաշրջության և ֆուտբոլային քաղաքակրթություն է, որը մենք չունենք, ինչը իսկապես ցավալի է:
Ընդամենը մի քանի ժամ և կկայանա «Բարսելոնա»- «Սևիլիա» սուպերգավաթի հանդիպումը։ Կատալոնյան ակումբը այս հանդիպումը կանցկացնի առանց բրազիլացի աստղ Նեյմարի, բայց, ինչպես նշում են անգամ «Սևիլիայի» ֆուտբոլիստները, Պեդրոն լիարժեքորեն կարող է փոխարինել Նեյմարին և այս խաղում անկասկած ֆավորիտը «Բարսելոնան» է:
Այնուհանդերձ՝ «Սևիլիայի» գլխավոր մարզիչն ասաց, որ անկախ հանգամանքներից իր թիմը խաղադաշտ է դուրս գալու սուպերգավաթը նվաճելու վճռականությամբ։ Առհասարակ «Բարսելոնան» սուպերգավաթը նվաճել է 4 անգամ՝ 1992, 1997,2009 և 2011 թվականներին: Իսկ ահա «Սևիլիան» բաղձալի տիտղոսին արժանացել է ընդամենը մեկ անգամ՝ 2006 թվականին, բայց հետաքրքիրն այն է, որ այդ սուպեր եզրափակչում «Սևիլիան» հաղթել է հենց «Բարսելոնային»:
Արդյո՞ք կհաջողվի «Սևիլիային» տոնել 2-րդ պատմական հաղթանակը, թե՞ «Բարսելոնան» ռևանշ կվերցնի և կավելացնի իր տիտղոսների քանակը։ Ֆուտբոլային այս հարցերի պատասխանը հայտնի կդառնա հաշված ժամեր անց: Մի բան պարզ է՝ սպասվում է անչափ հետաքրքիր և դիտարժան հանդիպում:
