Նկարիչների միությունում բացվել է «Հիշում ենք և պահանջում» խորագրով ցուցահանդեսը: Ցուցահանդեսից զատ տեղի է ունեցել նաև Նկարիչների միության հիմնադիր-նախագահ և «Նեմեսիս» ծրագրի մասնակից Արա Սարգսյանի կիսանդրի- հուշաքարի տեղադրումը հենց միության շենքի պատին:
Հայոց ցեղասպանության 100-րդ տարելիցին նվիրված միջոցառումներից անմասն չի մնացել նաև Նկարիչների միությունը: Ցեղասպանության 100-րդ տարելիցին ընդառաջ միությունում բացվեց «Հիշում ենք և պահանջում» խորագրով ցուցահանդեսը: Ցուցահանդեսին ներկայացված են գեղանկարչական, գրաֆիկական, քանդակի, կիրառական արվեստի 250 ստեղծագործություն:
Ինչպես «Ռադիոլուրի» հետ զրույցում նշեց Նկարիչների միության նախագահ Կարեն Աղամյանը՝ նկարիչները մեծ ոգևորությամբ են մասնակցել ցուցահանդեսին ներկայանալու մրցույթին: Ցուցահանդեսով բավականին տպավորված էր նաև Մշակույթի նախարար Հասմիկ Պողոսյանը: Նրան հատկապես դուր էր եկել այն, որ անվանի արվեստագետների աշխատանքների կողքին կարելի է տեսնել նաև եիտասարդ արվեստագետների գործեր:
Նախարարին շատ է ուրախացրել նաև նկարիչների միության շենքի պատին տեղադրված քանդակագործ Արա Սարգսյանի բրոնզե կիսանդրիով հուշաքարը: Նախարարի համար խորհրդանշական է հատկապես այն, որ Արա Սարգսյանի կիսանդրին ներկայացվեց հենց ցուցահանդեսի բացաման օրը:
