Աշխարհի լրատվամիջոցների արձագանքը՝ Հռոմի պապի «ցեղասպանության» եզրույթին. չի ուշացել նաեւ Թուրքիայի արձագանքը

Հռոմի Ֆրանցիսկոս Պապի ձեռամբ Վատիկանի սբ. Պետրոսի տաճարում Հայոց ցեղասպանության զոհերի հիշատակին նվիրված պատարագ մատուցվեց, որի ընթացքում Սրբազան քահանայապետն արտաբերեց «ցեղասպանություն» բառը։ Ֆրանցիսկոս պապը մասնավորապես ասել է, որ 20-րդ դարում առաջինը համարվող ցեղասպանությունը հարվածել է հենց հայ ժողովրդին:

Ինչպես գրում է BBC-ն, Օսմանյան կայսրությունում հայերի զանգվածային կոտորածը Պապը ցեղասպանություն է անվանել: «Չարի կոծկումը կամ ժխտումը նման է վերքին, որը չեն վիրակապել: Թուրքիան եղածը չի ճանաչում որպես ցեղասպանություն»,-մասնավորապես նշել է Հռոմի Պապը:

Նշենք, որ աշխարհի բոլոր հայտնի լրատվամիջոցներն անդրադարել են Հռոմի Պապի այսօր մատուցած Հայոց ցեղասպանության զոհերի հիշատակին նվիրված պատարագին եւ այդ ժամանակ Սրբազան քահանայապետի «ցեղասպանություն» բառը հնչեցնելուն:

Associated Press լրատվական գործակալությունն էլ փոխանցում է, որ Պապը այսօրվա արարողության ժամանակ նաև մեծարել է Սուրբ Գրիգոր Նարեկացուն՝ նրան շնորհելով «Տիեզերական եկեղեցու վարդապետ» տիտղոսը, որին մինչ օրս արժանացել էր ընդամենը 35 մարդ։

Ըստ «ֆրանս պրես» լրատվական գործակալության՝ այս քայլը կարող է Թուրքիայի հետ դիվանագիտական լարվածության առիթ դառնալ:

Աղբյուրը նշում է, որ բազմաթիվ պատմագետներ հայերի մասսայական կոտորածները բնութագրում են որպես ցեղասպանություն, թեև Թուրքիան համառորեն ժխտում է դա և հրաժարվում է ճանաչել ցեղասպանության փաստը:

Այդուհանդերձ, 20 երկրներ՝ ներառյալ Ֆրանսիան և Ռուսաստանը, ճանաչել են Օսմանյան Թուրքիայի կողմից իրականացված Հայոց ցեղասպանության փաստը և դատապարտել են այն:

Վատիկանի Սբ Պետրոսի տաճարում Հայոց ցեղասպանության 100-րդ տարելիցին նվիրված սուրբ պատարագի ժամանակ Հռոմի պապի հայտարարությունը, որով վերջինս, խոսելով Հայոց ցեղասպանության մասին, կիրառեց «ցեղասպանություն» եզրույթը, շոկային ազդեցություն է ունեցել Անկարայի վրա. տեղեկացնում է «Հուրրիյեթ» թերթի կայքը։

Պաշտոնական այցով Մոնղոլիայում գտնվող Թուրքիայի արտգործնախարար Մևլութ Չավուշօղլուն կապվել է Անկարայի պատկան մարմինների ու Վատիկանի դեսպանատան հետ և մանրամասն տեղեկություններ ստացել Պապի ելույթի վերաբերյալ։

Հեռախոսակապի ընթացքում նախարարը որոշել է կոշտ լեզվով պատասխան հայտարարությամբ հադես գալ։ Այս պահին Անկարայում հայտարարության գրավոր տեքստն են պատրաստում։