«ԴիասՊրո»․ Հայաստան-Սփյուռք ուժերի միավորում՝ կառավարման նոր մշակույթի համար․ «Սփյուռքի ձայնը»

Այսօր հայրենասիրությունը դադարել է լինել սոսկ զգացմունքային կատեգորիա. այն վերածվել է գործնական հարթակի, որտեղ համաշխարհային փորձն ու տեղական կարիքները հանդիպում են՝ ստեղծելով պետական կառավարման նոր որակ։

«ԴիասՊրո» և «իԳործ» ծրագրերը դարձել են այն կայուն կամուրջը, որով Սփյուռքի հայ մասնագետը ոչ թե պարզապես այցելում է Հայաստան, այլ դառնում է նրա զարգացման օրակարգը ձևավորողներից մեկը։

Գիտելիքի հայրենադարձություն. ավելին, քան պարզապես աշխատանք

Սփյուռքի գործերի գլխավոր հանձնակատարի գրասենյակի նախաձեռնությունները փաստում են մի կարևոր իրողություն՝ հայկական աշխարհի ուղեղային ներուժը պատրաստ է ծառայելու պետությանը։ Ինչպես նշում է Սփյուռքի գործերի գլխավոր հանձնակատարի գրասենյակի ծրագրերի իրականացման և մշտադիտարկման վարչության պետ Աննա Մհերյանը. «Մեր բոլոր ծրագրերի հիմնական շարժիչ ուժը հայրենասիրությունն է, իսկ նպատակը՝ հայրենադարձությունը»։

Հայտերի ընդունում և ժամկետներ. միացի՛ր պետականաշինությանը

Մասնագիտական ներուժի ներգրավման գործընթացն այսօր թևակոխել է ակտիվ փուլ։ «իԳործ» ծրագրի հայտերի ընդունումը մեկնարկել է հունվարի 26-ից և կշարունակվի մինչև մարտի 3-ը: Սա այն պատուհանն է, որի միջոցով Սփյուռքի կայացած մասնագետները կարող են մեկ տարի ժամկետով աշխատել Հայաստանի պետական գերատեսչություններում։ Իսկ «ԴիասՊրո» ծրագրի շրջանակներում արդեն իսկ ստացվել է 50 հայտ աշխարհի 20 երկրներից: Փետրվարի 20-ից մեկնարկում է հարցազրույցների փուլը, որի արդյունքում կընտրվեն լավագույնները՝ Հայաստանի տարբեր կառույցներում առցանց կամ ֆիզիկական ներկայությամբ աշխատելու համար։

Փորձը՝ որպես փոփոխության գործիք. մասնակցի հայացքով

«ԴիասՊրո» ծրագրի մասնակից, Հունաստանից ժամանած ֆինանսական աուդիտոր Տիգրան Ղալումյանի փորձը լավագույնս ցույց է տալիս, թե ինչպես կարող է սփյուռքահայ մասնագետի ներկայությունը ոգևորել և թարմացնել տեղական օղակների աշխատանքը։ Աշխատելով Վարդենիսի համայնքապետարանի հետ՝ նա նկատել է տեղական կադրերի պատրաստակամությունը. «Իրենք բավականին հետաքրքրված էին միջազգային փորձով, մեծ ցանկություն ունեին լսելու և հասկանալու, որպեսզի կարողանան իրենց գործունեությունը հարմարեցնել եվրոպական փորձին»։ Տիգրանի համար այս աշխատանքը զուտ մասնագիտական պարտականություն չէր, այլ առաքելություն. «Ես շատ ուրախ էի, որ կարողանում եմ օգտակար լինել իմ երկրին ու պետությանը։ Միանշանակ կա պոտենցիալ՝ ավելի բարելավելու համագործակցությունը»։

Որակյալ ներուժ՝ բարձր պահանջներ

Հատկանշական է, որ ծրագրերը գնալով դառնում են ավելի պրոֆեսիոնալ և թիրախային։ Այս տարի «իԳործ» ծրագրի համար սահմանվել է առնվազն 5 տարվա մասնագիտական ստաժի պահանջ, ինչը երաշխավորում է փորձառու մասնագետների հոսքը դեպի Հայաստան։ Աննա Մհերյանի դիտարկմամբ՝ սա ուղիղ ազդեցություն է ունենում աշխատանքի որակի վրա. «Տեղական ինքնակառավարման մարմինների շահագրգռվածությունը երբեմն ավելի մեծ է, քան պետական կառավարման համակարգինը»։

Կամուրջ, որը պետք է ամրացնել

Սփյուռքի մասնագետների ներգրավումը Հայաստանի պետականաշինության մեջ ռազմավարական անհրաժեշտություն է։ «ԴիասՊրո» ծրագիրը ապացուցում է, որ հեռավորությունը խոչընդոտ չէ, երբ կա մասնագիտական պատասխանատվություն և հայրենիքին օգտակար լինելու անկեղծ մղում։