Գրենլանդիան ցանկանում Է մնալ Դանիայի կազմում
ԱՄՆ նախագահ Դոնալդ Թրամփը չի հրաժարվում Գրենլանդիան Վաշինգտոնի հսկողության տակ առնելու ծրագրից: Նախօրեին Սպիտակ տան Օվալաձև աշխատասենյակում լրագրողների հետ զրուցելիս, նա ասել Է, որ Գրենլանդիան Միացյալ Նահանգներին նախևառաջ անհրաժեշտ Է անվտանգության տեսակետից:
Նույն օրը Վաշինգտոնում ԱՄՆ փոխնախագահ Ջեյ Դի Վենսը և պետքարտուղար Մարկո Ռուբիոն հանդիպել են Գրենլանդիայի և Դանիայի վարչապետներ Յենս-Ֆրեդերիկ Նիլսենի և Մետտե Ֆրեդերիկսենի հետ, որոնք ընդգծել են, որ Գրենլանդիան ցանկանում Է մնալ Դանիական Թագավորության կազմում:
Թրամփը նշել Է, թե չի բացառում Գրենլանդիային տիրանալու հնարավոր տարբերակներից և ոչ մեկը և հուսով Է, որ լուծում կգտնվի:
Լրագրողներից մեկը հիշեցրել Է, որ Դանիան Միացյալ Նահանգների կողքին Է կռվել թե՛ Աֆղանստանում և թե՛ Իրաքում, ինչին նախագահը պատասխանել Է. «Շնորհակալ եմ, որ դա ասացիք։ Գնահատում եմ։ Ես շատ լավ հարաբերություններ ունեմ Դանիայի հետ, կտեսնենք, թե ինչպես կստացվի ամեն ինչ։ Կարծում եմ՝ ինչ-որ բան կստացվի»։
Թրամփի փոխանցմամբ, լրագրողների հետ զրույցից հետո նա պետք Է հարցը քննարկի փոխնախագահի և պետքարտուղարի հետ: Նա կրկնել Է, որ Գրենլանդիան ԱՄՆ-ին անհրաժեշտ է ազգային անվտանգության համար, ապա կեսկատակ ավելացրել, թե Վենսից և Ռուբիոյից կիմանա հանդիպման արդյունքների մասին, և որքան լրագրողներին շուտ դուրս կհանի Օվալաձև աշխատասենյակից՝ այնքան ավելի շուտ դա կիմանա:
«Եթե մենք չմտնենք՝ Ռուսաստանը կամ Չինաստանը կմտնեն»
«Գիտեք, մենք խոսում ենք «Ոսկե գմբեթ»-ի {ամերիկյան գերարդիական ՀՕՊ համակարգի} մասին։ Մենք շատ բան ենք անում, մեզ իսկապես դա անհրաժեշտ է։ Եթե մենք չմտնենք {Գրենլանդիա}՝ Ռուսաստանը կմտնի, Չինաստանը կմտնի։ Եվ դա այն բանը չէ, որը Դանիան կարող է լուծել, դա միայն մենք կարող ենք անել»,- ասել Է Թրամփը։
Դանիացիները պնդում են, որ Գրենլանդիայի մոտակայքում օտար երկրների ուժային ներկայության նշաններ չկան:
Ավելին՝ ԱՄՆ կարող Է նոր ռազմակայաններ ստեղծել, ինչը համապատասպանում Է Կոպենհագենի և Վաշինգտոնի պայմանագրերին:
Սկանդինավյան երկրները զորավարժություններ են ծրագրում
Դանիայի պաշտպանության նախարար Տրոենս Լունդ Պոլսենը հայտնել Է, որ Դանիան, Շվեդիան և Նորվեգիան համատեղ կհզորացնեն ռազմական ներկայությունն Արկտիկայում և Հյուսիսային Ատլանտիկայում: Պատճառն անվտանգության և քաղաքականության հետ կապված լարվածության տարածումն Է նաև այդ տարածաշրջանում:
«Գրենլանդիայի կառավարության հետ սերտ երկխոսության միջոցով, մենք նաև համաձայնության ենք եկել մեծացնելու մեր ռազմական ներկայությունը և զորավարժություններ անցկացնելու Արկտիկայում և Ատլանտյան օվկիանոսի հյուսիսում՝ ՆԱՏՕ-ի դաշինքի հետ սերտ համագործակցությամբ»,- ասել Է Պոլսենը:
Այս թեմային Է անդրադարձել նաև Եվրոպական հանձնաժողովի նախագահ Ուրսուլա ֆոն դեր Լայենը:
«ՆԱՏՕ-ն տարբեր շահեր Է միավորում»
«Գրենլանդիան պատկանում է իր ժողովրդին, Դանիային և Գրենլանդիային է պատկանում, ուստի, միայն նրանք կարող են որոշում կայացնել Դանիային և Գրենլանդիային առնչվող հարցերի վերաբերյալ: Սա առաջին կետն է: Երկրորդ՝ Գրենլանդիան ՆԱՏՕ-ի մաս է կազմում, Արկտիկայի անվտանգությունը ՆԱՏՕ-ի առաջնահերթություններից Է, դաշնակիցներին կապող օղակը հստակ կարգախոսն Է՝ մեկը բոլորի, բոլորը մեկի համար: Այսպիսով, ՆԱՏՕ-ն հարթակ Է, որը միավորում Է տարբեր շահերը»,- հայտարարել Է Եվրոպական հանձնաժողովի նախագահը:
Գրենլանդացիները չգիտեն, թե ինչպես կլուծվի խնդիրը
Մարդիկ Գրենլանդիայում ուշիուշով հետևում են վաշինգտոնյան հանդիպումներին: Մայրաքաղաք Նուուկի բնակիչ Մայա Մարտինսենի խոսքով, Գրենլանդիան Դանիայի, հետևաբար՝ ՆԱՏՕ-ի մաս Է:
«Մխիթարական Է իմանալ, որ սկանդինավյան երկրները մեզ լրացուցիչ ռազմական օգնություն են ուղարկում»- ասել Է Մարտինսենը:
Բանակցություններում առաջխաղացում չի եղել
Մի դանիացի բարձրաստիճան պաշտոնյա, որի անունը չի հաղորդվում, ասել Է, որ Վաշինգտոնում ԱՄՆ-ի փոխնախագահի և պետքարտուղարի ու Դանիայի և Գրենլանդիայի վարչապետների քննարկումներից հետո «հիմնարար տարաձայնությունները պահպանվել են»:
