Լեհաստանը հետ կկանչի Գդանսկում Ռուսաստանի գլխավոր հյուպատոսության գործունեության վերաբերյալ իր համաձայնությունը, այսօր հայտարարել է Լեհաստանի արտաքին գործերի նախարար Ռադոսլավ Սիկորսկին։
Քաղաքական գործչի խոսքով՝ որոշումը կայացվել է, քանի որ Ռուսաստանը «չի դադարեցրել», այլ ավելի շուտ ուժեղացրել է իր «դիվերսիոն հարձակումները Լեհաստանի վրա»։
«Երբ լրտեսության և դիվերսիայի նպատակը մարդկային զոհերի պատճառ դառնալն է, մենք գործ ունենք ոչ թե դիվերսիայի, այլ պետական ահաբեկչության հետ։ Ես որոշել եմ հետ կանչել Գդանսկում Ռուսաստանի՝ վերջին հյուպատոսության գործունեության վերաբերյալ իմ համաձայնությունը», — ասել է Սիկորսկին։
Լեհաստանի արտաքին գործերի նախարարը հավելել է, որ առաջիկա ժամերին ռուսական կողմին կուղարկվի որոշման մասին տեղեկացնող պաշտոնական նոտա։
Մեկնաբանելով Լեհաստանի որոշումը՝ Ռուսաստանի արտաքին գործերի նախարարության խոսնակ Մարիա Զախարովան հայտարարել է, որ «որպես փոխադարձ միջոց՝ ռուսական կողմը կնվազեցնի Լեհաստանի դիվանագիտական և հյուպատոսական ներկայությունը Ռուսաստանում»։
Ներկայումս երկրում միակ լեհական գլխավոր հյուպատոսությունը շարունակում է գործել Իրկուտսկում։
Սիկորսկու խոսքով՝ չնայած Լեհաստանում բոլոր ռուսական գլխավոր հյուպատոսությունների փակմանը, երկրի դեսպանատունը Վարշավայում կշարունակի գործել։
Ավելի վաղ Լեհաստանը մեղադրել էր Ռուսաստանին երկաթուղային դիվերսիայի մեջ։
Նախորդ օրը Լեհաստանի ներքին գործերի նախարարության ներկայացուցիչը հայտարարել էր, որ նոյեմբերի 15-16-ին տեղի ունեցած դիվերսիան, որը վնասել էր Վարշավա-Լյուբլին երկաթուղային գծի հատվածները, կարող էր իրականացվել ռուսական հետախուզական ծառայությունների կողմից։ Պայթյունները տեղի են ունեցել Միկա գյուղի և Պուլավա քաղաքի մոտակայքում։ Վնասված գիծն ապահովում է ապրանքների մատակարարումը Ուկրաինա։
Լեհաստանի վարչապետ Դոնալդ Տուսկը նշել է, որ պայթյունի իրականացման մեջ կասկածվում են Ուկրաինայի երկու քաղաքացի, որոնք համագործակցել են ռուսական հետախուզական ծառայությունների հետ։ Նա ասել է, որ նրանք այժմ գտնվում են Բելառուսում։
