«Երիտասարդները ստեղծում են համը»․ Գավառում կայացավ ժողովրդական արհեստների միջազգային փառատոնը. «Հայագիտակ»

Գավառում անցկացվեց ժողովրդական արհեստների 4-րդ միջազգային փառատոնը՝ «Երիտասարդները ստեղծում են համը» խորագրով։ Միջոցառումն, որին մասնակցում էին հյուրեր ինչպես արտերկրից, այնպես էլ ՀՀ մարզերից, առանձնանում էր իր ներկայանալիությամբ և բազմազանությամբ։

Ժողարվեստի թանգարանի զարգացման գծով փոխտնօրեն Գայանե Ասլանյանի և հանրային կապերի պատասխանատու Գոհար Գևորգյանի փոխանցմամբ՝ փառատոնն անցել է ջերմ, բարեկամական և ստեղծագործական մթնոլորտում։ Հատկապես մեծ հետաքրքրություն է ներկայացրել թաղիքագործության և հայկական ավանդական խոհանոցի ուտեստների պատրաստման ցուցադրությունները։

Մասնակիցները, ներառյալ հյուրերն ու հայկական կողմը, համատեղ թաղիք են պատրաստել և պարել թաղիք ծեծելու ավանդական պարը։ Մասնակիցները մեծ հաճույքով մասնակցել են նաև Գավառի քյուֆթայի, գաթայի և փախլավայի պատրաստման գործընթացին, այնուհետև՝ վայելել դրանք։

Մարզերից ժամանած մասնակիցները ներկայացրել են իրենց նախընտրած արհեստների նմուշները։ Հատկապես տպավորիչ էր Հունաստանի ներկայացուցչի աշխատանքները, ով ցուցադրել և տեղում պատրաստել է հետաքրքիր գործեր։ Փառատոնի ընթացքում հնչել են Գավառի երիտասարդական ջազային խմբերի կատարումները։

Միջազգային այս փառատոնը կազմակերպվել էր Կրթության, գիտության, մշակույթի և սպորտի նախարարության և Շարամբեյանի անվան ժողարվեստի թանգարանի համատեղ ջանքերով։ Փառատոնը հերթական անգամ հաստատեց, որ արվեստը միավորում և մերձեցնում է մարդկանց՝ ստեղծելով ջերմ ու բարեկամական կապեր։