ԱՄՆ Գլոբալ մեդիայի գործակալությունը (USAGM) չեղարկում է «Ազատություն» ռադիոկայանի 2025 ֆինանսական տարվա դրամաշնորհային համաձայնագրի դադարեցումը, հայտնում է The Independent-ը՝ վկայակոչելով USAGM-ի ավագ խորհրդական Քարի Լեյքի նամակը «Ազատ Եվրոպա» ռադիոկայանի գործադիր տնօրեն Սթիվ Կապուսին:
Նամակում ասվում է, որ դրամաշնորհային համաձայնագրի դադարեցման նախորդ որոշումը չեղարկվել է, ինչը նշանակում է, որ «Ազատ Եվրոպա/Ազատություն» ռադիոկայանը կշարունակի դաշնային ֆինանսավորում ստանալ:
Լեյքը հավելել է, որ դրամաշնորհային համաձայնագիրը կարող է ավելի ուշ դադարեցվել, եթե USAGM-ն որոշի, որ այն հիմնավորված է կիրառելի օրենսդրությամբ:
Մարտի 14-ին ԱՄՆ նախագահ Դոնալդ Թրամփը հրամայել է փակել կառավարական 7 գործակալություն, ներառյալ USAGM-ը, որը վերահսկում է «Ամերիկայի ձայնը» և «Ազատ Եվրոպա» ռադիոկայանը: Սպիտակ տունը հայտարարել էր, որ ԱՄՆ հարկատուներն այլևս չեն զբաղվի արմատական քարոզչությամբ:
