Լոնդոնում մեկնարկել է Ուկրաինայի հարցով եվրոպացի առաջնորդների գագաթնաժողովը, հայտնում են միջազգային լրատվական գործակալությունները։
Գագաթնաժողովը կազմակերպել է Մեծ Բրիտանիայի վարչապետ Քիր Սթարմերը, որը նախօրեին արդեն հանդիպել է Լոնդոն ժամանած Ուկրաինայի նախագահ Վլադիմիր Զելենսկու հետ։
Տես նաև՝ Մեծ Բրիտանիան փորձում է վերականգնել ուկրաինական հակամարտության խաղաղ կարգավորման հույսը
Գագաթնաժողովին մասնակցում են նաև Գերմանիայի կանցլեր Օլաֆ Շոլցը, Ֆրանսիայի նախագահ Էմանուել Մակրոնը, Ֆինլանդիայի նախագահ Ալեքսանդր Ստուբը, Լեհաստանի վարչապետ Դոնալդ Տուսկը, Իսպանիայի վարչապետ Պեդրո Սանչեսը, Դանիայի վարչապետ Մետե Ֆրեդերիկսենը, Շվեդիայի վարչապետ Ուլֆ Քրիստերսոնը, Նորվեգիայի վարչապետ Յոնաս Գահր Ստյորեն, Չեխիայի վարչապետ Պետր Ֆիալան, Թուրքիայի արտգործնախարար Հաքան Ֆիդանը, Եվրոպական հանձնաժողովի նախագահ Ուրսուլա ֆոն դեր Լեյենը, ՆԱՏՕ-ի գլխավոր քարտուղար Մարկ Ռյուտեն, Եվրոպական խորհրդի նախագահ Անտոնիո Կոստան։ Հանդիպմանը ոչ եվրոպացի հյուրերի թվում է Կանադայի վարչապետ Ջասթին Թրյուդոն։
Բալթյան երկրները գագաթնաժողովին հրավիրված չեն։
Գագաթնաժողովի մեկնարկից առաջ Իտալիայի վարչապետ Ջորջա Մելոնին Լոնդոնում հանդիպել է Զելենսկու հետ։ Նա հավաստիացրել է նրան, որ աջակցում են Կիևին «արդար և կայուն խաղաղություն կառուցելու գործում, որը կապահովի Ուկրաինայի ինքնիշխանության, անվտանգության և ազատության ապագան»:
Մելոնին ավելի վաղ հեռախոսով խոսել է Դոնալդ Թրամփի հետ։ «Շատ կարևոր է խուսափել Արևմուտքի մասնատման վտանգից, և կարծում եմ, որ հենց այստեղ է, որ Մեծ Բրիտանիան և Իտալիան կարող են կարևոր դեր խաղալ կամուրջներ կապելու գործում», — ասել է Մելոնին Լոնդոնում Սթարմերի հետ հանդիպման ժամանակ:
