Հայ կամավորների միության (AVC) վերջին տվյալները ցույց են տալիս մի հետաքրքիր միտում․ անցած տարի Ֆրանսիայից ժամանած օտարերկրացի կամավորների թիվը գերազանցել է ֆրանսահայ կամավորներին։ Այս երևույթը նոր մարտահրավերներ է առաջադրում 2000-ականներից գործող կազմակերպությանը։
Հայ կամավորների միության գործադիր տնօրեն Արինա Զոհրաբյանը բացատրում է օտարերկրացիների աճող հետաքրքրության պատճառները։
«Օտարերկրացիներին հատկապես գրավում է հնարավորությունը՝ սեփական աչքերով տեսնել ու հասկանալ պատմական իրադարձությունները, ծանոթանալ հայ մշակույթին, ինչպես նաև փոքր երկրում կիրառել իրենց գիտելիքներն ու հմտությունները», — նշում է նա։
Բազմազան կամավորներ, յուրահատուկ փորձառություններ․ Կազմակերպությունը հպարտությամբ է նշում, որ վերջին տարիներին զգալիորեն ընդլայնվել է կամավորների տարիքային ու մասնագիտական շրջանակը։ «Այս տարի մեզ դիմել են նույնիսկ 70 և ավելի տարեկան փորձառու մասնագետներ, Հայաստանյան կազմակերպությունները մեծ հետաքրքրություն են ցուցաբերում նրանց փորձառությունն օգտագործելու հարցում»,- պատմում է Արինա Զոհրաբյանը.
Ինչ վերաբերում է սփյուռքահայ կամավորներին, ապա նրանց համար ծրագիրը դառնում է հայրենիքին վերադառնալու և արմատներին կապվելու յուրօրինակ հնարավորություն։
«Շատերը մեկից ավելի անգամ են վերադառնում Հայաստան կամավորական աշխատանքի», — հպարտությամբ նշում է միության գործադիր տնօրենը։ Օտարերկրացի կամավորների համար առանձնահատուկ փորձառություն է դառնում հայկական ընտանիքներում բնակվելը, ինչը նրանց հնարավորություն է տալիս խորությամբ ճանաչել հայկական մշակույթն ու կենցաղը։
Անձնական փորձառություն որպես օրինակ․ Արինա Զոհրաբյանի սեփական պատմությունը վառ օրինակ է այն բանի, թե ինչպես կարող է կամավորությունը վերածվել հայրենադարձության։ 2000-ականներին Հայաստան տեղափոխված Արինան կիսվում է իր դիտարկումներով․ «Մեծ երկրներում քո ներդրումը հաճախ աննկատ է մնում։ Իսկ Հայաստանում, որը քո հայրենիքն է, յուրաքանչյուր ջանք ունի իր տեսանելի ազդեցությունը»։
Հայ կամավորների միությունը շարունակում է կամուրջ հանդիսանալ Հայաստանի և աշխարհի միջև՝ ստեղծելով արժեքավոր՝ մարդկային ու մասնագիտական կապեր տեղացի և արտասահմանյան մասնագետների ու կազմակերպությունների միջև։
Այս փոխգործակցությունը նպաստում է ոչ միայն երկրի զարգացմանը, այլև միջմշակութային կապերի ամրապնդմանը և սփյուռքի հետ կապերի խորացմանը։
«Նշեմ նաև, որ Հայ կամավորների միության կամավորական ծրագրերին մասնակցելուց հետո հայրենադարձվել են ոչ միայն ազգությամբ հայեր, այլ նաև օտարներ», — եզրափակում է նա։
