Հայաստանի և Ադրբեջանի միջև ջրային ոլորտում իրականացվող ծրագրեր չկան․ ՇՄՆ խոսնակ․ «Էկոսֆերա»

Ադրբեջանում Միացյալ Նահանգների դեսպան Մարկ Լիբբին օրերս հայտարարել էր, որ Երևանն ու Բաքուն՝ Վաշինգտոնի ակտիվ աջակցությամբ, աշխատում են անդրսահմանային գետերի ջրային ռեսուրսների կառավարման ինտեգրված սխեմայի ստեղծման ուղղությամբ: 

«Ադրբեջանի և Հայաստանի հիդրոլոգների և ինժեներների մի խումբ՝ ԱՄՆ-ի ակտիվ աջակցությամբ, աշխատում է անդրսահմանային գետերի ջրային ռեսուրսների կառավարման ինտեգրված սխեմայի վրա», — ասել էր Մարկ Լիբբին։ 

ՀՀ շրջակա միջավայրի նախարարությունից «Էկոսֆերա»-ին հայտնեցին, որ Հայաստանի և Ադրբեջանի միջև անդրսահմանային գետերի ջրերի կառավարման ոլորտում պաշտոնական որևէ համագործակցություն չկա։ Լսենք ՇՄՆ մամուլի խոսնակ Անի Հակոբյանին․

«Հայաստանի և Ադրբեջանի միջև անդրսահմանային գետերի ջրերի կառավարման ոլորտում պաշտոնական համագործակցություն չկա։ Հայաստանի և Ադրբեջանի միջև այս ոլորտում իրականացվող ծրագրեր ևս չկան։ Հայտարարությունը հնչել է ԱՄՆ ՄԶԳ-ի (Միջազգային զարգացման գործակալություն) հետ համատեղ ծրագրի մասին։ Հայաստանը գործակալության հետ իրականացնում է ջրային ոլորտում «Հայաստանում ջրային ռեսուրսների կառավարման բարելավում» ծրագիրը, որի շրջանակներում մշակվում է Հարավային ջրավազանային կառավարման տարածքի 2025-2030 թվականների պլանը և գետերի ծանրաբեռնվածության հաշվարկման գործիքը։ Արդիականացվելու են Ախուրյան գետի վրա գտնվող երկու հիդրոլոգիական դիտակետեր, ինչպես նաև Արաքս-Սուրմալու հիդրոլոգիական դիտակետը։ Այս ծրագիրն արվում է միայն Հայաստանի հետ և ֆինանսավորվում է  ԱՄՆ ՄԶԳ-ի կողմից»։

^{Թեմայի շուրջ ավելի մանրամասն անդրադարձ կկատարենք առաջիկայում։}