Նրանց կյանքի գործն առողջապահական ոլորտն ու փոքրիկ բուժառուներին օգնելն է, իսկ մասնագիտությունը ոչ միայն անհրաժեշտ և յուրահատուկ է, այլև շատ պատասխանատու. ցանկացած սխալի գինը չափազանց բարձր է:
Ներդնելով իրենց գիտելիքներն ու հմտությունները՝ նրանք ոչինչ չեն խնայում երեխաների առողջության համար: Ցանկացած դժվարին, բարդ իրավիճակում, հաճախ անգամ անելով անհնարինը, նրանք միշտ փոքրիկների կողքին են՝ նպաստելու փոքրիկ բուժառուների ցանկացած հիվանդության ախտորոշմանը, բուժմանն ու նրանց շուտափույթ ապաքինմանը։
Ու չնայած երեխաները հաճախ են վախենում նրանց սպիտակ խալաթից, նվիրված, պրոֆեսիոնալ ու հոգատար մասնագետը կդառնա փոքրիկի լավագույն բարեկամն ու առողջ կյանքի երաշխավորը:
Երեխաների հետ շփվելն ու աշխատելը հաճելի է, բայց չափազանց պատասխանատու և բարդ:
Բժշկագիտության կարևորագույն բնագավառ՝ մանկաբուժությունը զբաղվում է երեխաների առողջության ուսումնասիրությամբ և բժշկական օգնությամբ, բժշկության ճյուղ, որն ուղղված է երեխաների առողջության պահպանմանը, մասնագիտություն, որտեղ գիտելիքներն ու հմտությունները բավարար չեն հաջող կլինիկական փոխհարաբերություններ երաշխավորելու համար. լավ զարգացած միջանձնային հմտություններն ու հոգեբանական պատրաստվածությունը կհեշտացնեն հաղորդակցումը փոքրիկ այցելուների հետ՝ հիմք դնելով նրանց առողջ կյանքին։
«Մասնագիտություն» հաղորդման հյուրը Ուիգմոր կանանց և երեխաների հիվանդանոցի մանկական վիրաբույժ, մանկական վիրաբուժական ծառայության պատասխանատու Արա Կարապետյանն է:
