Նախորդ տարի հուլիսին Հայաստանում անցկացվեց կիթառի ազգային փառատոն։ Այն երեք հիմնական նպատակ ունի․
- Հայ կիթառահարների հաջորդ սերնդին հզորացնելու համար տրամադրել անսամբլային ուսուցում և երաժշտություն ստեղծելու խորը փորձառություն՝ զարգացնելով երիտասարդ երաժիշտների տաղանդները։
- Կոնսերվատորիայի կիթառի բաժնում սովորող ուսանողների հմտությունները ներկայացնելու հարթակ տրամադրել՝ առաջ մղելով նրանց գեղարվեստական զարգացումը կատարողական հնարավորությունների միջոցով։
- Դասական կիթառի զարգացման համար Հայաստան հրավիրել միջազգային արտիստների՝ ոգեշնչում և առաջնորդություն առաջարկելով հայ երիտասարդներին։
Փառատոնը անցկացվելու է նաև այս տարի հուլիսին։ Փառատոնի հիմնադիր, ծնունդով Իրանից, լոնդոնաբնակ Մեղեդի Թիլիմյանը նշում է, որ սպասելիքները փառատոնի անցկացումից արդարացել են։
«Հայաստանում կիթառի աշխարհում իմ կապը Լինա Հայրապետյանի և Հակոբ Ջաղացպանյանի հետ էր։ Վերջինի շնորհիվ կոնսերվատորիայում փորձեր անցկացվեցին ուսանողների մասնակցությամբ, իսկ Լինան նաև նպաստեց փառատոնի տարածմանը՝ տեղեկացնելով տարբեր դպրոցների աշակերտներին և այլն»։
Մեկ շաբաթ տևած փառատոնը զարմանալի ջերմությամբ անցավ։ Երևանում և Գյումրիում անգլիացի ու հայ երաժիշտների մասնակցությամբ բացի համերգը նաև վարպետության դասեր անցկացվեցին», – ասում է Մեղեդին։
Անգլիացի երաժիշտներից մեկը՝ Քրիս Սթելը, Մեղեդի Թիլիմյանի ամուսինն է, որը 2010-թվականին առաջին անգամ գալով Հայաստան՝ սիրահարվել է երկրին ու նրա մշակույթին։
«Արդեն չորս տասնյակ անգամ Հայաստան եկած Քրիսը և անգլիացի այլ երաժիշտներ համերգներին պարտադիր հնչեցնում են հայկական երաժշտություն։ «Քրիսն այսօր ուսոումնասիրում է մեր կոմպոզիտորների ու աշուղների գործերը։ Զարմանում և հիանում է` յուրաքանչյուր անգամ դրանք լսելով։ Շատ գործեր պարտադիր ունենում են կիթառի համար նախատեսված երաժշտություն», պատմում է Մեղեդի Թիլիմյանը։
Մեղեդի Թիլիմյանը երաժշտական կրթություն է ստացել Իրանում։ Ասում է, որ նախատեսում է Իրանի կիթառի աշխարհին ծանոթացնել անգլիացի երաժշխտներին, իսկ հետագայում հայկական և իրանական երաժշտությունը ներկայացնել միջազգային հանրությանը։
Փորձելու ենք փառատոնը դարձնել միջազգային՝ ասում է։
