Ալիսա Գեւորգյան
«Ռադիոլուր»
Հունիսի 14- ին և 15- ին Պատանի հանդիսատեսի թատրոնում տեղի կունենա «Ես և նա» ռոք օպերայի պրեմիերան, որը ներկայացնում է «Էդիսոն» թատերախումբը՝ գեղարվեստական ղեկավար, ռեժիսոր և դերասան Արմեն Սարգսյանի գլխավորությամբ։
2013-ի հունիսին «One Armenia» կազմակերպությունը հայտարարեց դրամաշնորհի մրցույթ, որտեղ և հաղթող ճանաչվեց «Էդիսոն» թատերախումբը՝ առաջարկելով բեմադրել ռոք-օպերա Նար Դոսի «Ես և նա» պատմվածքի հիման վրա: Բեմադրության կոմպոզիտորը Արթուր Միտինյանն է՝ «Այաս» ռոք-խմբի հիմնադիրն ու աշխարհում առաջին «Բիթլզ ընդմիշտ» ռոք բալետի հեղինակը: Նա նաեւ բազմաթիվ օպերային, սիմֆոնիկ, կամերային, հոգեւոր, դաշնամուրային ստեղծագործությունների հեղինակ է, Ռուսաստանի կոմպոզիտորների միության անդամ: Երկար տարիներ ապրել և ստեղծագործել է ՌԴ-ում: 2008 թվականից տեղափոխվել և ապրում է Հայաստանում:
«Հայկական թատերախմբի հետ աշխատանքը գերագույն հաճույք էր»,- ասում է կոմպոզիտորը՝ խոստովանելով, որ իր բոլոր ստեղծագործություններն ինչ որ կերպ համեմված են հայկական շնչով, այդ թվում ներկայացվող ռոք օպերան։
Բեմադրության համար «One Armenia» կազմակերպությունը տրամադրել է 10 հազար դոլլար՝ հիմնականում տեխնիկական միջոցներ ձեռք բերելու համար։ Անձնակազմն աշխատել է, ինչպես ասում են, էնտուզիազմով: «Փորձելու ենք ապացուցել, որ ռոք-օպերա կարելի է բեմադրել նաև նման համեստ գումարով»,- ասում է «ԷԴԻՍՈՆ» թատերախմբի գեղարվեստական ղեկավար Արմեն Սարգսյանը՝ հույսը սակայն չկորցնելով, որ մշակույթին Հայաստանում էլ մի օր լուրջ միջոցներ և ուշադրություն կհատկացնեն։
